સ્પોર્ટસ:BCA પસંદગી સમિતિમાં CEO - એપેક્ષ સભ્ય હાજર રહી શકશે

સોમવારે રીલાયન્સ ક્રિકેટ મેદાન ખાતે બીસીએની સિલેકશન કમિટીમાં હાજર રહેવા ગયેલા સીઇઓ અને એપેક્ષ સભ્યનો એક પૂર્વ ક્રિકેટરે ઉધડો લેતાં મંગળવારે મળેલી એપેક્ષ કાઉન્સિલની બેઠકમાં બંધારણની છટકબારીનો લાભ લઇ સીઈએા અને એપેક્ષ સભ્ય હાજર રહી શકે તેવા નિયમને બહુમતીના જોરે બહાલી અપાઈ હતી. સિલેકશન કમિટીની બેઠકમાં બીસીસીઆઈના નિયમ મુજબ સિલેકટરો અને ફકત સેક્રેટરી કે પ્રમુખ જ હાજર રહી શકે છે તેમ છતાં સોમવારે સીઈઓ અને એક એપેક્ષ સભ્ય બેઠકમાં હાજર રહેવા ગયા ત્યારે એક પૂર્વ ક્રિકેટરે ઉધડો લેતાં બંને જણે બેઠકમાં ભાગ લીધો ન હતો.

આ ઘટનાને ગંભીરતાથી લઇ એપેક્ષ કાઉન્સિલમાં મંગળવારે ચર્ચા કરાઇ હતી જેમાં કેટલાક એપેક્ષ સભ્યોએ આ મુદે ફેર વિચારણા કરવા કહ્યું હતું પરંતુ બહુમતીના જોરે આ પ્રસ્તાવને મંજૂર કરાયો હતો.જેથી હવે સીઇઓ અને એપેક્ષ સભ્ય સિલકેશન કમિટીની બેઠકમાં હાજર રહી શકશે. બીસીએના પ્રવકતા સત્યજીતસિંહ ગાયકવાડે જણાવ્યું હતું કે ‘ મને આ અંગે બીસીએ તરફથી કાંઈ પણ બ્રીફ કરવામાં આવ્યું નથી.બીસીએ સેક્રેટરી અજીત લેલેએ જણાવ્યું હતું કે ‘કલ્પેશ પરમારને રજીસ્ટર્ડ એડીથી શો કોઝ અપાઈ છે અને નોટીસ મળ્યે 3 દિવસમાં જવાબ આપવા જણાવાયું છે. આ અંગે બીસીસીઆઈનાપૂર્વ સેક્રેટરી નિરંજન શાહે જણાવ્યું હતું કે ‘ભારતીય ક્રિકેટ કંટ્રોલ બોર્ડમાં અનેક હોદા પર હું રહી ચુકયો છું,પણ વરસોથી સિલેકશન કમિટીની બેઠકમાં સિલેકટરો ઉપરાંત ફકત સેક્રેટરી કે પ્રમુુખ જ હાજર રહે છે પણ અન્ય લોકો હાજર રહે તે બાબતથી આશ્ચર્ય થયું છે. બીજી તરફ બીસીએની સીલેકશન કમિટીની બેઠકમાં સોમવારે વિવાદ થતાં મંગળવારે પણ મુશ્તાક અલી ટ્રોફી માટેની ટી-20 ટીમની જાહેરાત અટવાઈ પડી હતી.