આયોજન:વસંત એ જ વેલેન્ટાઇનમાં પ્રેમનો શબ્દ છલકાટ

વેલેન્ટાઇન ડે પ્રેમસભર લાગણીઓનો તહેવાર. આ લાગણીઓને શબ્દોના સેતુ વડે જોડીને અંતરમનને ભીતરથી અજવાળતો કાર્યક્રમ છેલ્લા 23 વર્ષથી શહેરની સાહિત્ય સંસ્થા શબ્દસેતુ યોજે છે. વેલેન્ટાઇન ડેની પૂર્વ સંધ્યાએ પ્રેમથી તરબતર 30 કાવ્યોની ઓનલાઇન પ્રસ્તુતિ થઇ હતી.

વાંચતા જ પ્રેમની લાગણીઓ ‘ઓન’ થઇ જાય તેવી પંક્તિઓ...

દર્દને અેમ લયમાં ઢાળ્યા છે ગીત કૈં એ રીતે ઉજાળ્યા છે જેના ટહુકામાં નામ તારુ હો પંખીઓ એક બે મેં પાળ્યા છે- ડો.દિના શાહ

સાવ કોરુ છે હૃદય મારું, ગમે તે પાડ તું ડીઝાઇન બારમાસી દઇશ વસંત બની જા મારી વેલેન્ટાઇન- ગિરિરાજ બ્રહ્મભટ્ટ

ફુલોની મધમધતી આ મોસમ ફાઇન છે એ આપે સંદેશો ‘વેલેન્ટાઇન’ છે પ્રેમીજન માટે તો આ મંગલમય અવસર સોળ વરસની સાન સમજવાની શાઇન છે - ડો. વિરંચિ ત્રિવેદી

ઘટના પ્રસંગ ના કશો બનાવ છે સમજી શક્યો નથી હજી શાનો અભાવ છે વાતાવરણની મ્હેંક ગવાહી એ આપશે નક્કી જ આસપાસમાં એનો પડાવ છે - દિનેશ ડોંગરે ‘નાદાન’

જાગ્યો છે જોશ રક્તમાં, રગરગમાં સળવળાટ દિલમાં ઉમંગ છે અને તે પણ અનંત છે આબોહવામાં છે કશું નોંખુ જ આકર્ષણ છલકાય દરિયા ખુશ્બૂના, આજે વસંત છે - ગુલામ અબ્બાસ ‘નાશાદ’

ઝાકળ સજેલા પર્ણ પર ભીની સભા મળે મોસમ અહીં છલકાય, આ ફુલો ગુલાબના નાજુક વદન પર સ્પર્શની ચીતરી છે આરઝૂ ભ્રમર પછી વળ ખાય, આ ફુલો ગુલાબના - સુંદરમ્ ટેલર