નવો કોન્ટ્રાક્ટ અપાયો:ટ્યૂબવેલનો ઇજારો લંબાવી આપવાની ભલામણ ફગાવી

શહેરની હદમાં સમાવિષ્ટ થયેલા 7 ગામોમાં પાણી પૂરું પાડતા ટ્યુબવેલની મરામત કરવાનો વાર્ષિક 20 લાખનો ખર્ચો મંજૂર કરવામાં આવ્યો છે પણ વધુ છ મહિના માટે ઇજારો લંબાવવાની ભલામણ ફગાવી દેવામાં આવી છે.

હાલમાં શહેરને 50 કરોડ લિટરથી વધુ પાણી રોજનું પૂરું પડાઈ રહ્યું છે. આ સિવાય પાણી પુરવઠા વિભાગ હસ્તકની પાણીની ટાંકીના કમ્પાઉન્ડમાં તેમજ અન્ય સ્થળોએ મળી 75 ટ્યુબવેલ કાર્યરત છે. પાલિકાની હદમાં સમાવિષ્ટ 7 ગામોમાં પણ 34 ટ્યુબવેલ છે અને તેના કારણે કુલ ટયુબવેલની સંખ્યા 109 થાય છે. વેમાલી, સેવાસી, વડદલા, બિલ, ઉંડેરા, કરોળિયા સહિત 7 ગામો પાલિકાની હદમાં આવ્યા છે અને ત્યાં પાલિકાએ પાણી પહેલાં પાળ બાંધવાનું નક્કી કરી છે. જેના ભાગરૂપે આ સાત ગામોમાં પાણી પૂરું પાડતા ટ્યુબવેલના પમ્પ સેટ સહિતની મશીનરીની મરામત અને જાળવણી કરવા વાર્ષિક ઇજારો આપવા ટેન્ડર મંગાવ્યા હતા. જેમાં રૂ.20 લાખના ખર્ચે જરૂર પડે છ મહિના માટે વધુ ઇજારો આપવાની ભલામણ કરતી દરખાસ્ત સ્થાયી સમિતિમાં રજૂ કરવામાં આવી હતી.

જોકે, પાણી પુરવઠા વિભાગ અને વધુ છ મહિના ઇજારો લંબાવી આપવાની ભલામણ પર સ્થાયી સમિતિએ કાતર ફેરવી હતી અને ફક્ત એક વર્ષ માટે જ ઈજારો આપવા માટે મંજૂરી આપી હતી.