ભાસ્કર એક્સક્લુઝિવ:બે ચાવી હોય તો જ પ્રશ્નપત્રોની તિજોરી ખૂલે છે

એમ.સ.યુનિવર્સિટીની પરીક્ષાઓની ફુલ પ્રૂફ વ્યવસ્થાના પગલે પેપર લીક થવાની ઘટનાઓ બનતી નથી. પરીક્ષાના 4 કલાક પહેલાં જ સીલબંધ પેપર પ્રિન્ટિંગ પ્રેસમાં પ્રિન્ટ થવા માટે મોકલવામાં આવે છે. પ્રેસની તિજોરીમાં મૂકેલા પ્રશ્નપત્રની એક ચાવી પ્રેસ મેનેજર પાસે અને એક પરીક્ષા વિભાગ પાસે હોય છે, બંને સાથે લગાડવામાં આવે તો જ તિજોરી ખૂલે છે.

રાજ્ય સરકાર દ્વારા લેવાતી સ્પર્ધાત્મક પરીક્ષાઓમાં પેપર લીક થવાના પગલે અનેક પરીક્ષાર્થીઓનું સપનું રોળાઇ જાય છે. ત્યારે છેલ્લા કેટલાય વર્ષોથી પરીક્ષા લઈ રહેલી એમએસ યુનિવર્સિટીમાં પેપર લીક થવાની ઘટના બની નથી. યુનિવર્સિટી દ્વારા ગોઠવવામાં આવતી વ્યવસ્થા અને તેની પાછળની સમગ્ર પ્રક્રિયાના પગલે પેપર લીક થાય તેવી ઘટનાઓ ની શક્યતા નહીવત થઈ જાય છે. યુનિવર્સિટી ની વિવિધ વાર્ષિક પરીક્ષાઓના પેપરો કેવી રીતે નીકળે છે તે અંગે સમગ્ર સિસ્ટમ વિશે સમજવા પરીક્ષાની કામગીરી સાથે સંકળાયેલા અધ્યાપકો સાથે વાતચીત કરી હતી. પેપર કાઢવાની કામગીરીમાં સંકળાયેલા હોવાથી અધ્યાપક દ્વારા તેમના નામ જાહેર નહિ કરવાની શરતે માહિતી આપી હતી.

પ્રક્રિયા / સિલેબસથી માંડીને પ્રશ્નપત્રની પરીક્ષાખંડ સુધીની સફર

GPRS ટ્રેકર લાગેલું હોય છે
પરીક્ષાના 4 કલાક પહેલા પરીક્ષા વિભાગમાંથી એક વ્યકતિ ગાડીમાં ડ્રાઇવર સાથે યુનિ.ના પ્રીન્ટીંગ પ્રેસ સુધી લઇ જાય છે. પેપર લઇ જવાય છે તે વાહનને જીપીઆરએસ ટ્રેકર સાથે સજ્જ હોય છ.ગાડી પ્રેસ સુધી પહોંચી કે નહિ તેની લાઇવ મુવમેન્ટ અધિકારીઓ જોઇ શકે છે.