લ્યો બોલો!:વડોદરામાં ટ્રેન અને સ્ટેશન બાદ રેલવેનાં દવાખાનાંનું પણ ખાનગીકરણ!

રેલવે દ્વારા 13 લાખ કર્મચારીઓ માટે મેડિક્લેમની યોજના લવાઈ રહી છે. આ માટે રેલવે દ્વારા 22 ઓક્ટોબરે 3 ઉચ્ચ અધિકારીઓની કમિટીની રચના કરાઈ છે, જે દિવાળી બાદ 22મી તારીખે રિપોર્ટ રજૂ કરશે. સામાન્ય દેખાતી આ ઘટના પાછળ રેલવેના દવાખાનાનું ખાનગીકરણ કરવાનો તખ્તો ગોઠવાયો હોવાની મેડિકલ ક્ષેત્રે સંકળાયેલા રેલવેના કર્મચારીઓમાં ચર્ચા છે. રેલવે સ્ટેશન અને ટ્રેનો બાદ દવાખાના પણ ખાનગી કંપનીઓને સોંપી દેવાશે તો હાલત કફોડી થશે, તેવો રોષ રેલવે કર્મચારીઓમાં છે.

વડોદરામાં પ્રતાપનગર ખાતે એક ડિવિઝનલ હોસ્પિટલ તેમજ વડોદરા યાર્ડ પ્લેટફોર્મ, ડભોઇ, ગોધરા, આણંદ મળી 6 મેડિકલ યુનિટ છે. વડોદરા ડિવિઝનમાં 1 હજાર ઉપરાંત કર્મચારી દવાખાનામાં ફરજ બજાવે છે. વડોદરા રેલવેના મેડિકલ ક્ષેત્રે સંકળાયેલા અધિકારીએ જણાવ્યા મુજબ 100 બેડની હોસ્પિટલ કાર્યરત છે, જે ભવિષ્યમાં લોક ભાગીદારીથી ચાલે તો નવાઈ નહીં.

રેલવેમાં આર્મી સમાન દવાખાનાની સુવિધા
કેન્દ્ર સરકારની એક માત્ર આર્મી પછીનું કાર્યક્ષેત્ર રેલવે છે જ્યાં આર્મી જેવાં પોતાનાં દવાખાના અને તબીબી સુવિધા છે. રેલવેના કર્મચારી, રિટાયર્ડ કર્મચારી અને તેમના પરિવારને રેલવેના દવાખાનામાં સુવિધા મળે છે, ત્યાં સુવિધા ન હોય તો ખાનગીમાં થયેલી સારવારનો ખર્ચ રેલવે દ્વારા અપાય છે.