એમ્યુલન્સમાં પ્રસૂતિ:મધ્યપ્રદેશની સગર્ભાને મધરાતે દોઢ વાગે વડોદરા ડેપો ખાતે એસટી બસમાં પ્રસૂતિની પીડા ઉપડી, 108 એમ્બ્યુલન્સમાં જ બાળકને જન્મ આપ્યો

વડોદરા10 દિવસ પહેલા
  • કૉપી લિંક
108 એમ્બ્યુલન્સની ટીમે એમ્બ્યુલન્સમાં જ મહિલાની પ્રસૂતિ કરાવી હતી - Divya Bhaskar
108 એમ્બ્યુલન્સની ટીમે એમ્બ્યુલન્સમાં જ મહિલાની પ્રસૂતિ કરાવી હતી
  • 108ની ટીમે પ્રસૂતિ કરાવીને માતા અને નવજાત શિશુને હેમખેમ ઉગારી લીધા

વડોદરા શહેરની 108 એમ્બ્યુલન્સની ટીમે વધુ એકવાર સગર્ભા મહિલાને ઉગારવાની સફળ કામગીરી મધરાત્રે કરીને કર્તવ્યનિષ્ઠાનો ઉજ્જવળ દાખલો બેસાડ્યો છે. મધ્યપ્રદેશની સગર્ભા મહિલાને મધરાતે દોઢ વાગે વડોદરા બેસ ડેપો ખાતે એસટી બસમાં પ્રસૂતિની પીડા ઉપડી હતી, જેથી 108 એમ્બ્યુલન્સની ટીમે એમ્બ્યુલન્સમાં જ પ્રસૂતિ કરાવી હતી. હાલ મહિલા અને બાળક બંનેની તબિયત સારી છે.

મહિલાને એસટી બસમાં પ્રસૂતિની પીડા ઉપડી
મધ્યપ્રદેશના અલીરાજપુરના સગર્ભા નાનકીબેન પોતાના કુટુંબીજનો સાથે સૌરાષ્ટ્રના કાલાવડથી છોટાઉદેપુર જવા નીકળ્યા હતા. તે દરમિયાન મધ્યરાત્રિના દોઢ વાગ્યાના સુમારે તેઓને પ્રસૂતિની પીડા ઉપડતા કઠિન સંજોગો ઊભા થયા હતા. એસટી બસ વડોદરા ડેપો પહોંચતા જીવન રક્ષક સેવા 108ને જાણ કરવામાં આવી હતી.

માતા અને બાળકની હાલત સારી છે
સંજોગોની નાજુકતા સમજીને ઇ.એમ.ટી. વિષ્ણુ બારીયા અને પાયલોટ અરવિંદ માલીવાડ તુરંત જ 108 એમ્બ્યુલન્સ સાથે ઘટના સ્થળે પહોંચી ગયા હતા. સગર્ભાને તુરંત જ 108 એમ્બ્યુલન્સમાં ખસેડીને આ લોકોએ ખૂબ સમયસૂચકતા સાથે એમ્બ્યુલન્સમાં જ પ્રસૂતિ કરાવી માતા અને નવજાત શિશુને હેમખેમ ઉગારી લીધા હતા. માતા અને બાળકની હાલત સારી છે.

સ્વતંત્રતા દિવસ સમારોહમાં 108 ટીમનું સન્માન કરાયું હતું
108 એમ્બ્યુલન્સના કર્મીઓની આ કર્તવ્યનિષ્ઠા સૌ કોઇએ વખાણી છે. યાદ રહે કે, 108 એમ્બ્યુલન્સ, વડોદરાની ટીમે કોરોના કટોકટીમાં નીડરપણે સતત કામ કરીને દર્દીઓને સમયસર હોસ્પિટલ પહોંચાડવાની સેવાઓ આપી હતી. તેને અનુલક્ષીને સ્વતંત્રતા દિવસ સમારોહમાં ટીમનું સન્માન કરવામાં આવ્યું હતું.

અન્ય સમાચારો પણ છે...