મતદાન:આજે બરોડા ડેરીના 7 ઝોન માટે મતદાન થશે, કુલ 13 પૈકી 6 ઝોનના ઉમેદવારો બિનહરીફ, 600 મતદારો 7 ડિરેક્ટરનું ભાવિ નક્કી કરશે

બરોડા ડેરીના નિયામક મંડળની સોમવારના રોજ સવારે 9 થી બપોરે 3 વાગ્યા સુધી ચૂંટણી યોજાશે. જેમાં કુલ 7 ઝોનના ઉમેદવારોને 600 જેટલા મતદારો મત આપી તેમનું ભાવી નક્કી કરશે. આ મતદાન બરોડા ડેરી સંકુલમાં જ કરવામાં આવશે. ઉલ્લેખનિય છે કે, બરોડા ડેરીના 13 ઝોનમાંથી 6 ઝોનના ઉમેદવારો બિનહરીફ થતાં હવે 7 ઝોનમાં જ ચૂંટણી થશે.

જેના માટે ચૂંટણી અધિકારી વિજય પટણી દ્વારા 18 ડિસેમ્બરના રોજ ફાઇનલ ઉમેદવારોની યાદી પણ બહાર પડાઈ હતી. સોમવારના રોજ વડોદરા, પાદરા, શિનોર-તિલકવાડા, સંખેડા, ડભોઈ, સાવલી અને ડેસર ઝોનની ચૂંટણી યોજાશે. મતદાન બાદ મંગળવારના રોજ નર્મદાભુવન ચૂંટણી અધિકારીની કચેરી ખાતે મત ગણતરી થશે, જેમાં ચૂંટણી રિઝલ્ટ જાહેર કરવામાં આવશે.