કોરોનાની ફૂંક:દારૂ પીધેલાને પકડવાના પોલીસના 50 બ્રેથ એનલાઈઝર કોરોના સુપર સ્પ્રેડર બની શકે

કોરોના મહામારી વચ્ચે 31 ડિસેમ્બરની પાર્ટીનાં તમામ આયોજનો પર પોલીસ તંત્ર દ્વારા મનાઈ ફરમાવી છે. આ ઉપરાંત શહેર પોલીસ રોજ મુખ્ય માર્ગો પર દારૂ પીધેલાઓને પકડવા માટે બ્રેથ એનલાઈઝર સાથે ચેકિંગ પણ શરૂ કર્યું છે. જોકે કોરોના કાળમાં એક જ બ્રેથ એનલાઈઝરનો વારંવાર ઉપયોગ વાહનચાલકો ઉપરાંત અધિકારીઓના આદેશનું પાલન કરતા પોલીસ કર્મીઓ માટે પણ જોખમી બને છે.

આલ્કોહોલનું પ્રમાણ ચકાસવા બ્રેથ એનાલાઈઝરની ટ્યૂબમાં ફૂંક મારવાની હોય છે. આ ફૂંકની સાથે થૂંકના છાટા મશીન પર ઉડતા હોય છે. દિવસ દરમિયાન 500થી વધુ લોકો ફૂંક મારતા તમામના ડ્રોપલેટસ મશીન પર ચોંટતા હોય છે,જેનાથી કોરોના વાઈરસ ફેલાઇ શકે છે.

દરેકની ચકાસણી બાદ પાઈપ બદલાતી હોવાનો પોલીસ દાવો કરી રહી છે જો કે ડોક્ટરોના મુજબ એક વ્યક્તિ ફૂંક મારે ત્યારે જો એનલાઈઝરની પાઈપ બદલી નખાતી હોય તો પણ જે તે વ્યક્તિના ડ્રોપ લેટ મશીન પર ચોંટી જતા હોય છે. તેવામાં એક વ્યક્તિ ફૂંક મારે તો આખુ સાધન સ્ટરિલિયમથી સાફ કરી સુકાવીને ફરીથી તેને વાપરવું જોઈએ.

કોરોના ગાઈડ લાઈન પોલીસ પણ સંક્રમિત થઈ શકે
રસ્તાઓ પર પોલીસકર્મી દ્વારા જ્યારે કોઈ વ્યક્તિનું બ્રેથ એનલાઈઝર દ્વારા ચેકિંગ કરે છે ત્યારે તે પોલીસકર્મી કોરોના ગાઈડ લાઈન મુજબ 6 ફૂટનું અંતર પણ જાળવતી નથી જ્યારે પોલીસકર્મીએ હાથમાં ગ્લવ્ઝ પણ ન પહેરેલા હોવાથી જે તે વ્યક્તિએ મારેલી ફૂંકવાળી ટ્યૂબમાં ચોટેલા ડ્રોપલેટ પોલીસના હાથમાં પણ લાગે છે. જેથી તે પોલીસકર્મીને પણ સંક્રમિત થવાનો અને સુપરસ્પ્રેડર બનવાનો ભય રહેલો હોય છે. આ ચકાસણીમાં કોરોનાની ગાઈડલાઇન તો ઠીક કોરોનાની લાઈન પડે તેવી ભીતિ સેવાઈ રહી છે.

તકેદારી સાથે ઉપયોગ કરાય છે
કોઈ એક વ્યક્તિના ચેકિંગ બાદ બ્રેથ એનલાઈઝરની પાઈપ બદલી દેવામાં આવે છે. ચેકિંગ પહેલાં અને પછી પોલીસ કર્મી પોતાના હાથ અને સામેવાળા વ્યક્તિના હાથ સેનેટાઈઝ કરે છે. જ્યારે યોગ્ય ડિસ્ટન્સ સાથે અને પૂરતી તકેદારી સાથે બ્રેથ એનલાઈઝરનો ઉપયોગ કરવામાં આવે છે. > ચિરાગ કોરડિયા, જેસીપી

બે દિવસમાં 1000થી વધુ લોકોનું ચેકિંગ
શહેરના 26 પોલીસ સ્ટેશન અને ટ્રાફિક બ્રાંચમાં 50થી વધુ બ્રેથ એનલાઈઝર છે. બે દિવસમાં 1000થી વધુ લોકોનું ચેકિંગ કરવામાં આવ્યું છે. જે પૈકી રોજ 30થી વધુ લોકો પીધેલા પકડાયા હતા.

કોરોના કાળમાં બ્રેથ એનલાઇઝર જોખમી > સંક્રમણ તજજ્ઞ ડો. હિતેન કારેલિયા