તપાસ:બોગસ માર્કશીટ કૌભાંડમાં અન્ય નામો ખૂલતાં પોલીસ અલવર પહોંચી

શહેરમાં તાજેતરમાં બહાર આવેલા બોગસ માર્કશીટ કૌભાંડની તપાસ કરી રહેલી પીસીબી પોલીસે રાજસ્થાન અને અમદાવાદના 3 એજન્ટને ઝડપી લીધા હતા. ત્રણેયની પૂછપરછ બાદ અલવરની સનરાઇઝ યુનિ. સાથે સંકળાયેલા અન્ય એજન્ટોની શોધખોળ કરવા માટે પોલીસની એક ટીમ રાજસ્થાન પહોંચી છે. આ ત્રણેય એજન્ટ અગાઉ પકડાયેલા દિલીપ મોહીતેના સાથીદારો છે. પીસીબીએ ગત મહિને ઓનલાઇન સટ્ટાની તપાસમાંથી આંતરરાજ્ય સ્તરનું બોગસ માર્કશીટ કૌભાંડ ઝડપી પાડી દિલીપ મોહીતે, વિક્કી સરદાર અને વિરલ જયસ્વાલની ધરપકડ કરી હતી.ત્યારબાદ દિલીપ મોહીતેના એજન્ટ રહેલા સનરાઇઝ યુનિ.ના પ્રોફેસર કમ એજન્ટ વિક્રમ મોહનસિંહ ચૌહાણ, ગૌરવ સત્યનારાયણ અગ્રવાલ, નવીન હરીલાલ ઉમરાણિયાને ઝડપી લીધા હતા. 500થી વધુ માર્કશીટ વેચનાર ત્રણેય પાસેથી મળેલી માહિતી આધારે અલવરની સનરાઇઝ યુનિ.ના અન્ય એજન્ટોનાં નામ જાણવા મળતાં પોલીસની ટીમ રાજસ્થાન પહોંચી છે.

MSU પાસે બોગસ માર્કશીટ આધારે પ્રવેશ અંગે માહિતી માગતાં 15 દિવસે જવાબ નહીં
પોલીસ સૂત્રોએ જણાવ્યું હતું કે વડોદરાની એમએસ યુનિ.માં બોગસ માર્કશીટના આધારે કેટલા વિદ્યાર્થીઓએ એડમિશન મેળવ્યા છે તેની માહિતી યુનિ. સત્તાધીશો પાસે મંગાવાઇ છે પરંતુ 15 દિવસ પછી પણ યુનિવર્સિટી સત્તાધીશો એ પોલીસને કોઇ યોગ્ય જવાબ આપ્યો ન હતો જેથી પોલીસે ફરીથી પત્ર લખ્યો છે.