નુકશાન:સુભાનપુરામાં 100 વર્ષ જૂના આફ્રિકી મૂળના મહાકાય ચોરઆંબલાનો એક ભાગ તૂટી પડ્યો

સુભાનપુરા-ગોરવા જવાના રસ્તે સોમવારે સવારે ચોરઆંબલા તરીકે ઓળખાતા એક વૃક્ષની વિશાળ ડાળી તૂટી પડી હતી. આ વિસ્તારમાં આ વૃક્ષ છેલ્લા 100 વર્ષ જેટલા સમયથી હતું. લોકડાઉન છતાં વૃક્ષના તૂટી પડેલા ભાગને જોવા સ્થાનિકો એકત્ર થયા હતા. પર્યાવરણવિદ ડો. જિતેન્દ્ર ગવળીએ જણાવ્યું કે, ‘ આ વૃક્ષનો ઘેરાવો લગભગ 14 ફૂટનો છે અને ઊંચાઇ 45 ફૂટ જોતા વૃક્ષની વય 100 વર્ષનું હશે તેમ કહી શકાય. આ વૃક્ષોમાં થડ તો વિશાળ હોય છે  પણ ડાળીનો પણ જબદસ્ત વિકાસ થતો હોય છે. તેથી વધુ વજનને લીધે આ ડાળી પડી ગઇ હોય.  આ વૃક્ષ બાઓબા તરીકે વિશ્વભરમાં ઓળખાય છે. ગણપતપુરા ગામે 45 ફૂટના થડના ઘેરાવાવાળુ વિશાળ વૃક્ષ છે. આ વૃક્ષના થડનો પહોળો ભાગ એટલા માટે હોય છે કેમકે તેમાં પાણી ભરાયેલું હોય છે. મ.સ. યુનિ.ના પૂર્વ પ્રાધ્યાપક ડો. અરુણ આર્યે જણાવ્યું કે,  આ વૃક્ષના છોડવા ગાયકવાડી શાસનમાં આફ્રિકન દેશોમાંથી લવાયાની શક્યતા છે.