કામગીરી:આજે સાંજે 7 વિસ્તારોના દોઢ લાખ લોકોને પાણી નહીં મળે, ગ્રેવિટી લાઇનના જોડાણની કામગીરી હાથ ધરાશે

શિયાળામાં પાણીના વપરાશ પર બ્રેક વાગતી હોવાથી પાલિકા અને પાણી પુરવઠા વિભાગ મોટાભાગની કામગીરી પૂરી કરવાનું આયોજન કરી રહી છે. જેના ભાગરૂપે સોમવારે સાંજે 4 પાણીની ટાંકી અને બે બુસ્ટર વિસ્તારમાં પાણી કાપ મૂકાયો છે.આજવાના ડેડ સ્ટોરેજનું પાણી ઉપાડવાના કામે ફ્લોટિંગ પોનટુન બેઝ પંપિંગ નેટવર્કનું ગ્રેવિટી લાઇન સાથે જોડાણ કરવાનો નિર્ણય લેવાયો હતો. પાણીને 900 ડાયાને ગ્રેવિટી લાઇન સાથે જોડાણ કરવાની કામગીરી પાલિકા દ્વારા સોમવારે હાથ ધરાશે,

જેને કારણે સોમવારે સાંજે પાણીગેટ ટાંકી, ગાજરાવાડી ટાંકી, નાલંદા ટાંકી, સયાજીપુરા ટાંકી તથા વાઘોડિયા રોડ ઉપર આવેલા સંખેડા દશાલાડ બુસ્ટર અને નંદધામ બુસ્ટર થી પાણી વિતરણ કરાશે નહીં. પાલિકાની આ કામગીરીના પરિણામે સોમવારે પાણીગેટ, દાંડિયા બજાર રોડ ,ચાર દરવાજા, ગાજરાવાડી, સયાજીપુરા,ખોડિયાર નગર,વાઘોડિયા રોડ અને તેની આસપાસના ભાગના દોઢ લાખ લોકોને સાંજે પાણી મળશે નહીં. મંગળવાર સુધીમાં આ કામગીરી પૂર્ણ થાય તેવો અંદાજ છે. ત્યારબાદ મંગળવાર પૂરતું પાણી લો પ્રેશરથી વિતરણ કરવામાં આવશે.