ચુકાદો:પાલિકાના ડે. ઇજનેરને લાફો મારનારને 1 વર્ષની કેદ, નરસિંહજીની પોળમાં વર્ષ 2017માં બનાવ બન્યો હતો, આરોપીને રૂા. 2 હજારનો દંડ

વડોદરાએક મહિનો પહેલા
  • કૉપી લિંક
પ્રતિકાત્મક તસવીર - Divya Bhaskar
પ્રતિકાત્મક તસવીર

નરસિંહજીની પોળમાં ડ્રેનેજની સફાઇ કામગીરી ચાલતી હતી ત્યારે પાલિકાના ડે.એક્ઝિક્યુટિવ ઇજનેરને સ્થળ પર બોલાવ્યા બાદ તેને બે લાફા મારી ડ્રેનેજમાં નાંખી દેવાની ધમકી આપનાર શખ્સને ન્યાયાધીશે એક વર્ષની સાદી કેદની સજા તેમજ રૂા.2 હજારનો દંડ ફટકાર્યો હતો. આ બનાવ 2017માં બન્યો હતો. ન્યાયાધીશે ગુનામાં સંડોવાયેલા અન્ય એક આરોપીને શંકાનો લાભ આપી નિર્દોષ છોડી મુકવાનો આદેશ આપ્યો હતો.કેસની વિગત એવી છે કે, તા.3 ઓગષ્ટ 2017ના રોજ નરસિંહજીની પોળમાં ડ્રેનેજની સફાઇની કામગીરી ચાલતી હતી ત્યારે હેમંત ચાૈહાણે કોર્પોરેશનના ડે.એક્ઝીક્યુટીવ ઇજનેર નીરજ ચાૈહાણને ફોન કરી બોલાવ્યાં હતા.

અધિકારી સ્થળ પર આવતાં હેમંત ચાૈહાણ સહિતના શખ્સોએ ઝઘડો કર્યો હતો અને હેમંત ચાૈહાણે ઇજનેરને બે લાફા મારી દીધા હતા તેમજ તેને ગટરમાં નાંખી ઢાંકણુ બંધ કરી દેવાની ધમકી આપી હતી.આ બનાવ અંગે જે તે સમયે હેમંત ચાૈહાણ તેમજ કમલેશ પટેલ વિરુદ્ધ ગુનો દાખલ થયો હતો. આ અંગેનો કેસ અત્રેની અદાલતમાં ચાલી જતાં એપીપી તરૂણ દેસાઇ હાજર રહ્યાં હતા. ન્યાયાધીશે અધિકારીને લાફો મારવાના બનાવમાં આરોપી હેમંત ચાૈહાણ (રહે. નરસિંહજીની પોળ)ને કસુરદાર ઠેરવી એક વર્ષની સાદી કેદની સજા તેમજ રૂા.2 હજારનો દંડ ફટકાર્યો હતો.

જ્યારે આરોપી કમલેશ પટેલને શંકાનો લાભ આપી નિર્દોષ છોડી મુકવાનો આદેશ કર્યો હતો. કોર્પોરેશનના વિવિધ વિભાગોમાં ફરજ બજાવતાં કર્મચારીઓ સાથે અનેકવાર ઘર્ષણના બનાવો બનતાં હોય છે, ત્યારે 4 વર્ષ પહેલાં અધિકારીને માર મારવાના બનાવમાં આરોપીને અદાલતે સજા ફટકારતાં આ બાબત હાલ લોકોમાં અને કોર્પોરેશનમાં ભારે ચર્ચાનો વિષય બની છે.

અન્ય સમાચારો પણ છે...