એરટ્રાફિકમાં વધારો:એક મહિનામાં 3 હજારથી વધુ હવાઇ મુસાફરો વધ્યા

કોરોનાના કેસો ઘટતાં લોકોમાં હવે તેનો ખોફ ઓછો થયો છે સાથે જ એરપોર્ટમાં પણ ચહલપહલ વધી છે. છેલ્લા એક મહિના દરમિયાન વડોદરા એરપોર્ટના એર ટ્રાફિકમાં 8%નો વધારો નોંધાયો છે. વડોદરા ઇન્ટીગ્રેડેટ એરપોર્ટ સૂત્રના જણાવ્યા મુજબ ડિસેમ્બર મહિનામાં હવાઇ યાત્રા કરનારા 38,555 મુસાફરો વડોદરા એરપોર્ટ પર નોંધાયા હતા. જ્યારે જાન્યુઆરી મહિનામાં આ સંખ્યા વધીને 41,741 થઇ ગઇ હતી. એક મહિનામાં 3,186 પેસેન્જર્સનો એર ટ્રાફિક વધ્યો હતો.

બીજા શબ્દોમાં કહીએ તો રોજના સરેરાશ 100 કરતાં વધુ હવાઇ મુસાફરોની વડોદરા એરપોર્ટ પર અવરજવર વધી હતી. આગામી સમયમાં આ સંખ્યા વધુ નોંધાય તેવી શક્યતા છે. જોકે હાલમાં ભલે કોરોનાના કેસો ઘટ્યા હોય પણ એરપોર્ટ ખાતે સાવચેતીનાં પગલાં લેવાનું યથાવત્ છે. ઉલ્લેખનીય છે કે, કોરોના અગાઉ વડોદરા ઇન્ટીગ્રેડેટ એરપોર્ટ પર મહિને સરેરાશ એક લાખથી વધુ મુસાફરોની અવરજવર રહેતી હતી.