કોલ્ડ વેવ:સિઝનમાં પહેલીવાર પારો 10 પર, આજથી ઠંડી ઘટશે : ધુમ્મસને કારણે સવાર ધૂંધળી બની

શહેરમાં વહેલી સવારથી જ કોલ્ડવેવના પગલે સિઝનમાં પહેલી વખત ઠંડીનો પારો 10 ડિગ્રી નોંધાયો હતો. સવારે 5 થી 6 વાગ્યાની વચ્ચે પારો 10 ડિગ્રી સુધી પહોંચ્યો હતો. દિવસ દરમિયાન ઠંડીની તીવ્રતાએ લોકોને ધ્રુજાવ્યા હતા. 30 ડિસેમ્બરથી કોલ્ડવેવની અસર ઓછી થતાં ઠંડીનો પારો 11 ડિગ્રી સુધી પહોંચશે.ઉત્તર દિશામાંથી ફૂંકાતા સૂકા અને ઠંડા પવનોના પગલે બે દિવસથી ઠંડીની તીવ્રતા વધી હતી. મંગળવારે 15 કિમીના પવનોથી વાતાવરણ ઠંડુંગાર થઈ ગયું હતું. જ્યારે વહેલી સવારે ધુમ્મસને કારણે વિઝિબિલિટી ઘટી ગઈ હતી. દિવસ દરમિયાન પવનોથી બચવા ઘરો તેમજ ઓફિસમાં જ રહેવાનું પસંદ કર્યું હતું.

મહત્તમ તાપમાન પણ 25.7 ડિગ્રી નોંધાયું
29 ડિસેમ્બરે મહત્તમ તાપમાનનો પારો 25.7 ડિગ્રી, જ્યારે લઘુતમ તાપમાનનો પારો 10 ડિગ્રી નોંધાયો હતો. ભેજનું પ્રમાણ સવારે 54 ટકા અને સાંજે 33 ટકા નોંધાયું હતું. બીજી તરફ ઉત્તર-પૂર્વની દિશાથી એવરેજ 15 કિમીની ઝડપે પવન ફૂંકાયો હતો. 30 ડિસેમ્બરના રોજ ઠંડા પવનોની અસર ઓછી થતાં ઠંડીનો પારો 11 ડિગ્રી સુધી નોંધાય તેવી સંભાવના છે.