અકસ્માત:સુરતથી સોમનાથ જતી લક્ઝરી બસ ભરૂચ પાસે ડિવાઇડર પર ચડી ગઈ, 10થી વધુ મુસાફર ઇજાગ્રસ્ત

સુરતથી સોમનાથ જતી લકઝરી બસના ચાલકે સ્ટેઇરિંગ પરનો કાબૂ ગુમાવતા ભરૂચ RTO પાસે અકસ્માત નડ્યો હતો. જેમાં 10થી વધુ મુસાફરોને સામાન્ય ઇજાઓ થઇ હતી. જેથી તેઓને સ્થાનિક હોસ્પિટલમાં સારવાર અર્થે ખસેડવામાં આવ્યા હતા.

સદનસીબે બસ પલટી ખાતા બચી ગઇ
સુરતથી સોમનાથ જતી લક્ઝરી બસ ચાલકે કાબૂ ગુમાવતા ડિવાઈડર પર બસ ચડી ગઇ હતી. જોકે, સદનસીબે બસ પલટી ખાતા બચી ગઇ હતી. જેથી જાનહાની ટળી ગઇ હતી. લક્ઝરી બસ મુસાફરો પૈકી 10થી વધુ મુસાફરને સામાન્ય ઇજાઓ પહોંચી હતી. જેઓને હાલ સ્થાનિક હોસ્પિટલમાં સારવાર આપવામાં આવી રહી છે.

અકસ્માતને પગલે ભરૂચ હાઇવે પર ટ્રાફિકજામ થયો
લક્ઝરી બસને થયેલા અકસ્માતને પગલે ભરૂચ હાઇવે પર ટ્રાફિકજામ થયો હતો. જેથી વાહન ચાલકો મુશ્કેલીમાં મૂકાઇ ગયા હતા.