કાર્યવાહી:પત્નીની હત્યામાં જયેશ પટેલને1 દિ‘ના રિમાન્ડ

આજવા રોડ પર રહેતા શિક્ષક પતિએ નર્સ પત્નીની કરેલી હત્યા માં હરણી પોલીસે પતિની ધરપકડ કરી સોમવારે અદાલતમાં રજુ કરી વિવિધ મુદ્દાની તપાસ માટે 1 દિવસના રિમાન્ડ મેળવ્યા હતા.આજવા રોડના અમરદીપ હોમ્સમાં રહેતાં ગોત્રી હોસ્પિટલમાં નર્સ તરીકે ફરજ બજાવતાં શિલ્પાબેન પટેલ શુક્રવારે રાત્રે 7 વાગ્યે તે મોપેડ લઇને નોકરી પર જવા નીકળ્યા બાદ વૈકુંઠ-2ના વળાંક પાસે તેમની લાશ મળી હતી. પોલીસે પતિ જયેશ પટેલની પૂછપરછ કરતાં તેણે કબૂલાત કરી હતી કે, પત્ની તેની પર સતત શંકા કરતી હતી કે, પતિ જયેશને અન્ય કોઈ સ્ત્રી સાથે સંબંધ છે અને તેના કારણે ઘરમાં કંકાસ પણ વધી જતાં કંટાળી પત્નીની હત્યા કરી હતી. હરણી પોલીસે જયેશ પટેલના 1 દિવસના રિમાન્ડ મેળવ્યા હતા.પોલીસે જણાવ્યું હતુ કે આ ગુનામાં અન્ય કોઇ વ્યકતીએ તેને મદદ કરી છે કે કેમ તેની તપાસ ઉપરાંત અન્ય કોઇ વાહનનો ઉપયોગ કર્યો હતો કે કેમ તથા અન્ય કોઇ સ્ત્રી સાથે તેને સબંધ હતો કે કેમ તે સહિતના મુદ્દા પર રિમાન્ડ દરમિયાન તપાસ કરાશે. પત્નીને કારમાં પાંજરા પોળ તરફ લઇ જવાનો તેનો કેમ હેતું હતો અને હત્યા અંગે તેણે પ્રિપ્લાન કર્યું હતું કે કેમ તેની પણ તપાસ કરાશે.