કોરોના ઇફેક્ટ:1126 ફેરિયાની તપાસ, તરસાલીના ફેરિયાનો કોરોના રિપોર્ટ પોઝિટિવ, 14 અનફિટ મળ્યા, જ્યારે 5 ફેરિયાઓનાં સેમ્પલ લેવાયાં

શહેરમાં કોરોનાના કેસોની સંખ્યા દિન પ્રતિદિન વધી રહી છે ત્યારે કેટલાક દિવસથી સંભવિત સુપર સ્પ્રેડર એવા શાકભાજીના ફેરિયાનું સ્ક્રીનિંગ કરાઈ રહ્યું છે. બુધવારે વધુ 1126 ફેરિયાનું સ્ક્રીનિંગ કરાયું હતું, જેમાં તરસાલીના એક ફેરિયાનો રિપોર્ટ પોઝિટિવ આવ્યો હતો. અત્રે ઉલ્લેખનીય છે કે, તા.13ના રોજ વધુ 1126 ફેરિયાનું સ્ક્રીનિંગ કરાયું હતું અને તેમાં 14 અનફિટ મળ્યા હતા, જ્યારે 5નાં સેમ્પલ લેવાયાં હતાં. 6 દિવસમાં 11,538 લોકોનું સ્ક્રીનિંગ કરાયું હતું અને 163 લોકોને હોમ ક્વોરન્ટાઇન કરાયા હતા. 6 દિવસમાં લેવાયેલાં 37 સેમ્પલમાં વધુ એક પોઝિટિવ આવ્યો હતો. 13મીના રોજ તરસાલી મણિનગરના જયેશ વણકરનો રિપોર્ટ પોઝિટિવ આવતાં સોસાયટીમાં સેનેટાઈઝેશન કરાયું હતું. શહેરમાં દરેક વહીવટી વોર્ડ દીઠ 500 જેટલા શાકભાજીના ફેરિયા ફેરી કરી રહ્યા છે અને 50 ટકા એવા છે કે જેઓ સયાજીપુરાથી કે અન્ય જગાએથી શાક, ફ્રૂટ લાવીને વેચી રહ્યા છે. મોટાભાગના ભંગારિયા પાસે લારી કે હાથ રિક્ષા હોવાથી શાક લાવવામાં સરળતા રહે છે. અત્રે ઉલ્લેખનીય છે કે, પાલિકા સંભવિત સુપર સ્પ્રેડર એવા શાકભાજીના ફેરિયાઓનું સ્ક્રીનિંગ કરાવે છે, જેમાંથી અનફિટને અલગ તારવે છે, જ્યારે શંકાસ્પદ હોય તેવા ફેરિયાઓના રિપોર્ટ કરાવવામાં આવે છે.