ચૂંટણીના કરોડપતિ ઉમેદવારો:વડોદરાના મેયરે 10 કરોડ, માંજલપુરમાં યોગેશ પટેલે 33 કરોડ; અપક્ષમાંથી મધુ શ્રીવાસ્તવે 33 કરોડની સંપત્તિ જાહેર કરી

વડોદરાના મેયર અને સયાજીગંજ વિધાનસભા બેઠક પરથી ભાજપના ઉમેદવાર કેયુર રોકડિયાએ 10 કરોડ 77 લાખની સંપત્તિ જાહેર કરી છે. માંજલપુર બેઠક પર ભાજપના ઉમેદવાર યોગેશ પટેલે 33 કરોડ 86 લાખની સંપત્તિ દર્શાવી છે.

ભાજપ-કોંગ્રેસના ઉમેદવારો કરોડપતિ
વડોદરા સિટી (અનુસૂચિત જાતિ અનામત) બેઠક પરથી કોંગ્રેસના ગુણવંતરાય પરમારે 2 કરોડ 67 લાખ 78 હજારની સંપત્તિ જાહેર કરી છે. કરજણના કોંગ્રેસના ઉમેદવાર પ્રિતેશ પટેલે 3 કરોડ 47 લાખની સંપત્તિ સોગંદનામામાં દર્શાવી છે. સાવલી બેઠક પર કોંગ્રેસના ઉમેદવાર કુલદિપસિંહ રાઉલજીએ 2 કરોડ 81 લાખ 99 હજારની સંપત્તિ જાહેર કરી છે.

અપક્ષ મધુ શ્રીવાસ્તવની સંપત્તિ 33 કરોડ 91 લાખ
જ્યારે અપક્ષ ઉમેદવારી નોંધાવનાર વાઘોડિયાના ભાજપના પૂર્વ ધારાસભ્ય મધુ શ્રીવાસ્તવે 33 કરોડ 91 રૂપિયાની સંપત્તિ દર્શાવી છે. ઉલ્લેખનીય છે કે વર્ષ 2017માં મધુ શ્રીવાસ્તવે 31 કરોડ 40 લાખની સંપત્તિ જાહેર કરી હતી. એટલે કે તેમની સંપત્તિમાં પણ વધારો થયો છે.

ડભોઇમાં આપના ઉમેદવાર માલેતુજાર
વડોદરા જિલ્લાની ડભોઇ બેઠક પર આમ આદમી પાર્ટીના ઉમેદવાર અજીતસિંહ ઠાકોરે ઉમેદવારીપત્ર ભર્યું હતું. જેમાં તેમણે રેકોર્ડ 343 કરોડની સંપત્તિ જાહેર કરી છે. આ સંપત્તિમાં મોટો હિસ્સો તેમની જમીનનો છે. ઉલ્લેખનીય છે કે ડભોઇમાં ભાજપે શૈલેષ સોટ્ટાને રિપિટ કર્યા છે.

અપક્ષ દિનુમામની સંપત્તિ 65 કરોડ
બીજી તરફ વડોદરા જિલ્લાની કરજણ બેઠક પર ભાજપના ઉમેદવાર અક્ષય પટેલે 3 કરોડ 46 લાખની સંપત્તિ દર્શાવી છે. પાદરામાં અપક્ષ દિનેશભાઇ (દિનુમામા)એ 65 કરોડ 92 લાખની સંપત્તિ જાહેર કરી છે. વડોદરાની અકોટા બેઠક પરથી અપક્ષ ઉમેદવાર દીપક પાલકરે 23 લાખ 12 હજારની સંપત્તિ જાહેર કરી છે.