• Gujarati News
  • Local
  • Gujarat
  • Vadodara
  • In The Disposal Of Dry Waste, The Corporation Is 'dry', Out Of 50 Tons Of Plastic Waste Per Day In Vadodara, 7 Tons Is Processed In Surat, The Rest Is Dumped.

ભાસ્કર એક્સકલૂઝિવ:ડ્રાય વેસ્ટના નિકાલમાં પાલિકા જ ‘ડ્રાય’, વડોદરામાં રોજના 50 ટન પ્લાસ્ટિક વેસ્ટ પૈકી 7 ટન સુરતમાં પ્રોસેસ, બાકીનું ડમ્પ

વડોદરા3 મહિનો પહેલા
  • કૉપી લિંક
સ્વચ્છ સર્વેક્ષણની 2022ના માર્કિંગ સ્કીમ મુજબ 
2000 માર્ક્સમાંથી 1200 માર્ક્સ સૂકા કચરાના નિકાલ માટે ફાળવેલા છે - Divya Bhaskar
સ્વચ્છ સર્વેક્ષણની 2022ના માર્કિંગ સ્કીમ મુજબ 2000 માર્ક્સમાંથી 1200 માર્ક્સ સૂકા કચરાના નિકાલ માટે ફાળવેલા છે
  • સ્વચ્છ સર્વેક્ષણમાં પાલિકાને ડ્રાયવેસ્ટના નિકાલના 80માંથી 30 માર્ક્સ મળે તેવી હાલત, પ્રદૂષણનો ખતરો યથાવત્
  • 43 ટન પ્લાસ્ટિકમાંથી મોટા ભાગનો ડમ્પિંગ સાઈટ પર જ ઠલવાય છે
  • 50 વર્ષથી પણ વધુ સમય પ્લાસ્ટિકને ડિ-કમ્પોઝ કરતા લાગે છે

સ્વચ્છ સર્વેક્ષણ 2022માં મહત્ત્વની બાબત કચરાના પ્રોસેસિંગ અને ડિસ્પોઝલ (નિકાલ)ની છે. પાલિકાના અધિકારીઓના જણાવ્યા મુજબ વડોદરામાં રોજનો 50 ટન પ્લાસ્ટિક વેસ્ટ સર્જાય છે. જોકે પાલિકા પાસે આનો વૈજ્ઞાનિક ઢબે નિકાલ કરવા વ્યવસ્થા નથી, જેથી રોજનો સરેરાશ 7 ટન પ્લાસ્ટિક વેસ્ટ સુરત મોકલવો પડે છે. બીજી તરફ બાકીના કચરાને ડમ્પિંગ સાઇટમાં જ નખાય છે. આવો કચરો ભેગો થતાં ભૂગર્ભ જળને પણ લાંબા ગાળે અસર પહોંચી શકે છે.

પ્લાસ્ટિકને ડિકમ્પોઝ કરતાં 50 વર્ષથી પણ વધુ સમય લાગે છે. ત્યારે તે 0.1 માઇક્રોમીટર જેવડા અતિશય નાના-નાના કણોમાં તૂટી જાય છે અને તેની નીચેની જમીનમાં ઊતરીને ભૂગર્ભજળ સાથે ભળી જાય છે. આવું પાણી જ્યારે કોઇ પાકની નીચે હોય ત્યારે જે તે પાકમાં પણ તે પ્રવેશે છે તેવાં સંશોધનો પણ થયાં છે. બીજી તરફ સ્વચ્છ સર્વેક્ષણની 2022ના માર્કિંગ સ્કીમ મુજબ 2 હજાર માર્ક્સમાંથી 1200 માર્ક્સ સૂકા કચરાના નિકાલ માટે ફાળવેલા છે ત્યારે આ હાલત રેન્કિંગને પાછળ ધકેલી શકે છે.

પાલિકાએ કચરામાંથી પ્લાસ્ટિક વેસ્ટને જુદો કરવા ઓન રેકોર્ડ 650 જેટલા વેસ્ટ કલેક્ટર્સ (પીકર્સ) રાખ્યા છે, જે રોજ રસ્તા પરના કચરામાંથી પ્લાસ્ટિક લઇ જઇ શકે છે. તેમજ તેને માર્કેટમાં વેચી શકે છે. 1લી માર્ચથી સ્વચ્છ સર્વેક્ષણ 2022ની જાહેરાત કરાઇ છે. જેમાં કચરાના નિકાલ માટેના ઇનોવેશન્સ માટે કે પદ્ધતિઓ માટેના ભરપૂર માર્ક્સ અપાય છે.ત્યારે પાલિકા હજી પોતાનો કોઇ પ્લાન્ટ ઊભો કરી શકી નથી. જે પ્લાસ્ટિકને પ્રોસેસ માટે નથી મોકલી શકાતું તે રજિસ્ટર્ડ પિકર્સ દ્વારા પ્લાસ્ટિક કલેક્ટર્સ વેપારીઓ પાસે પહોંચે છે અને સિમેન્ટની ભઠ્ઠીમાં કે અન્ય રીતે નિકાલ થઇ જાય છે.

7 ટન પ્લાસ્ટિક વેસ્ટ પ્રોસેસ માટે કોઇ ખર્ચ નહીં
વડોદરાથી દરરોજનું સરેરાશ 7 ટન પ્લાસ્ટિક સુરત મોકલાય છે પણ પાલિકાને એક રૂપિયાનો ખર્ચ થતો નથી. આ વિશેનું કારણ દર્શાવતાં પાલિકાના અધિકારી કહે છે કે, સુરતની ઇકો વિઝન નામની કંપનીને પાલિકા પ્લાસ્ટિક આપે છે. પ્રોસેસિંગ બાદ જે પ્લાસ્ટિક કંપની તૈયાર કરે છે, તેમાંથી કંપની પોતાની આવક મેળવે છે.

1 જુલાઇથી સિંગલ યૂઝ પ્લાસ્ટિક પર પ્રતિબંધ
પ્લાસ્ટિક વેસ્ટ મેનેજમેન્ટ રૂલ્સ (2016)માં સુધારો ગત મહિને કરવામાં આવ્યો હતો. આગામી 1લી જુલાઇથી કેટલાક સિંગલ યૂઝ પ્લાસ્ટિકના વપરાશ પર પ્રતિબંધ મૂકવામાં આવી રહ્યો છે. જેમાં પ્લાસ્ટિકના કપ, ગ્લાસ, ચમચી, ચપ્પુ, સ્ટ્રો, મીઠાઇના બોક્સમાં આવતા રેપર, ઇયર બડ્સની દાંડી, પ્લાસ્ટિકના ઝંડા, થર્મોકોલ ડેકોરેશનની આઇટમો પર પ્રતિબંધ મૂકાઇ જશે. સ્વચ્છ સર્વેક્ષણમાં પણ પ્લાસ્ટિક વેસ્ટ ઓછો કરવા પર ભાર મૂકવામાં આવ્યો છે. જોકે પાલિકાએ આ દિશામાં પણ કોઇ નક્કર પગલાં ભર્યાં નથી.

ટૂંક સમયમાં 40 ટન પ્લાસ્ટિક પ્રોસેસ માટે યુનિટ શરૂ કરાશે
માણેજા ખાતે પ્લાસ્ટિક વેસ્ટના પ્રોસેસિંગ માટેનું યુનિટ શરૂ કરવાના પ્રયાસો થઇ રહ્યા છે. એકવાર આ યુનિટ ચાલુ થઇ જશે પછી રોજ 7 ટન પ્લાસ્ટિક સુરત મોકલવું નહીં પડે અને 40 ટન પ્લાસ્ટિક વડોદરામાં જ પ્રોસેસ થઇ જશે. વેસ્ટ કલેક્ટર્સ પણ હાલમાં પ્લાસ્ટિક દૂર કરવામાં મહત્ત્વનો ભાગ ભજવી રહ્યા છે, હાલ પૂરતું આ બાબત મદદરૂપ થતી હોવાથી તેના પર ધ્યાન આપી રહ્યા છીએ. પાલિકા તેમને પણ કેટલીક રકમ સહાય તરીકે આપે છે. - શૈલેશ નાયક, એડિશનલ સિટી એન્જિનિયર

અન્ય સમાચારો પણ છે...