તકેદારી:પીળા પાણીની સમસ્યા ટાળવા આજવાની સફાઈ પૂરજોશમાં

વડોદરા5 દિવસ પહેલા
  • કૉપી લિંક
  • જળાશયમાંથી રોજ 10-15 ટ્રેક્ટર ભરીને કચરો નીકળે છે
  • રોજ 30 કર્મી વેલાની સફાઈ કરે છે, રૂા.30 લાખનો ખર્ચ થશે

શહેરના પૂર્વ અને દક્ષિણ વિસ્તારના 6 લાખ નાગરિકોને પીવાનું પાણી પૂરું પાડતા ગાયકવાડી જમાનાના આજવા જળાશયમાં ફરી પીળા પાણીની સમસ્યા ન સર્જાય તે માટે સફાઇ અભિયાન શરૂ કરાયું છે અને તેમાં રોજ 10થી 15 ટ્રેક્ટર ભરાય તેટલો કચરો નીકળી રહ્યો છે.

આજવા સરોવરમાંથી રોજ 14.50 કરોડ લિટર પાણીનો ઉપાડ કરાય છે. હાલ આજવાની સામેના કિનારા તરફના રામેશરા વિસ્તાર બાજુથી જંગલી વનસ્પતિ અને વેલા તણાઇને આવ્યા છે. ચોમાસું પૂરું થતાં દિવાળી બાદ પવન ફૂંકાતાં આ વનસ્પતિ અને વેલા સામેથી તણાઈને આજવા તળાવમાં અને આસપાસના વિસ્તારમાં આવે છે.

દર વર્ષે સફાઈ ન કરે તો વનસ્પતિ પાણીમાં પડી રહીને કોહવાઈ જતાં પાણી આછા પીળા રંગનું થઇ જાય છે અને તે પાણીનું વિતરણ કરાતાં ઉહાપોહ થાય છે. પાલિકાએ મોડે મોડે ઊંઘ ઉડાવીને રોજેરોજ વનસ્પતિ સહિતના કચરાને બહાર કાઢવાની કવાયત શરૂ કરી છે.

તેના કારણે પીળા પાણીની ફરિયાદ નહીં આવે તેવો દાવો તંત્રે કર્યો છે. એક તબક્કે રોજ 50 કર્મી સફાઈમાં જોડાયા હતા. અલબત્ત હાલ 30 કર્મી રોજ 10 થી 15 ટ્રેક્ટર ભરીને કચરો કાઢે છે. સફાઈની કામગીરી એકાદ મહિનો ચાલશે. જેની પાછળ 30 લાખનો ખર્ચ થશે.

અન્ય સમાચારો પણ છે...