ભાસ્કર વિશેષ:લગ્ન બાદ ગૃહપ્રવેશની વિધિમાં ચોખામાં સંતાડેલી ચિઠ્ઠી નવવધૂના હાથમાં આવતાં જ સાસરિયાં વક્રી

લગ્ન કરીને ગૃહપ્રવેશ કર્યા બાદ દેવમંદિરે નવયુગલને પાણીમાં સિક્કો શોધવવાની રમત રમાડતા તો બધાએ જોયા હશે. વડોદરાના આજવા રોડ વિસ્તારમાં રહેતા એક પરિવારમાં અનોખો રીતિરીવાજ છે. જે મુજબ વાસણમાં મુકેલા ચોખામાં નવયુગલે હાથ નાખવાનો, કન્યાના હાથમાં ચિઠ્ઠી આવે તો તે અશુભ ગણાય છે. વર્ષ પહેલા લગ્ન કરીને આવેલી નવવધુને ચોખામાંથી ચિઠ્ઠી મળતાં તેના માથે આભ તૂટી પડ્યું હતું. સાસરિયાએ તેને કમભાગી માની ત્રાસ આપવાનું શરૂ કરી દહેજની માગણી કરી હતી. આખરે પરિણીતાએ અભયમને જાણ કરતાં ટીમે પહોંચી જઇ પરિવારને સમજાવી સમાધાન કરાવ્યું હતું.

સાથે સાથે ફરી આવું કરશે તો ગુનો નોંધાશે તેવી ચીમકી આપી હતી. પ્રાપ્ત માહિતી મુજબ સુકન્યા (નામ બદલ્યું છે) ના સામાજિક રિવાજ મુજબ ધામધૂમથી લગ્ન થયા હતા. લગ્ન બાદ ગૃહ પ્રવેશ દરમિયાન જ્ઞાતિના રીવાજ પ્રમાણે ચિઠ્ઠી સંતાડવામાં આવી હતી. ચિઠ્ઠી ચોખામાં ચિઠ્ઠી સંતાડવામાં આવે અને વરવધુને ચોખામાં હાથ નાખી શોધવાનું જણાવવામાં આવે છે. રમતમાં કોના હાથ મા ચીઠી આવે છે તે ઉપર થી શુભ અશુભ નો કાલ્પનિક જાણકારી મેળવાય છે.

જેમાં સુકન્યાના હાથમાં ચોખા મુકેલી ચિઠ્ઠી આવી જતા મારા સાસુ અને નણંદ જોર જોર થી રડવા લાગ્યા હતા. અને કહ્યું હતું કે, તું કમભાગી છે, જેથી અમારા પરિવાર ને બહુ મોટુ નુકસાન થશે હવે પછી તારા પિયર માંથી અમારે ઘરે કોઈ આવવું જોઈએ નહીં. અને વધારે દહેજ લાવવા ફરમાન કરવામાં આવ્યું હતું. લગ્નનાં દિવસે સુકન્યા સાથે સાસરીવાળાના વર્તનથી તે ખુબ દુખી થઇ હતી.

કન્યાના પતિ જી આઈ ડી સી મા નોકરી કરે છ. અને સાસુની કાનભંભેરણીથી પતિ સુકન્યાને મારતો હતો. અને પિયરમાંથી દહેજ લઇને આવવા માટે દબાણ કરતો હતો. સાસરયાઓના ત્રાસથી સુકન્યાએ અભયમની મદદ માંગી હતી.અભયમ ટીમે સુકન્યાના સાસરીયાઓને સાચી સમજ આપતાં ભૂલ બદલ માફી માંગી હેરાનગતિ ન કરવા ખાત્રી આપી હતી.

રૂઢિચુસ્ત જડ માન્યતા સાચી હોતી નથી
અભયમની ટીમે સાસરિયાંને સમજાવી જણાવ્યું હતું કે, રૂઢિચુસ્ત જડ માન્યતા પ્રણાલી સાચી હોતી નથી અને આવી માનસિકતાથી પુત્ર અને વહુનો સંસાર ન બગાડવો જોઇએ. આ ઉપરાંત વહુને આ રીતે હેરાન કરવી, દહેજ લાવવા દબાણ કરવું તે ગુનો બને છે તેમ સમજાવી કડક તાકીદ પણ કરી હતી.