ધમકી:માર માર્યાની ફરિયાદ કરનાર પત્નીને જાનથી મારી નાખવા પતિની ધમકી

શહેરના મહેતા પોળ વિસ્તાર તથા નિઝામપુરા વિસ્તારમાં રહેતી 2 પરિણીતાઓએ પતિ અને સાસરિયાના અત્યાચારથી કંટાળી પોલીસમાં ફરિયાદ નોંધાવી હતી.

મહેતા પોળમાં રહેતી મહિલાએ પતિ પૌમીલ રમેશચન્દ્ર બ્રહ્મભટ્ટ સામે ફરિયાદ નોંધાવી હતી કે, તેમના લગ્ન 2008માં થયા હતા અને સંતાનમાં તેમને 1 બાળક છે. છેલ્લાં 5 વર્ષથી પતિ નાની-નાની બાબતોમાં મારઝૂડ કરી શારીરિક-માનસિક ત્રાસ આપતો હતો. તેણે ઝઘડો કરી મારઝૂડ કરતાં મહિલાએ પોલીસમાં ફરિયાદ કરી હતી. જેથી પતિએ ઉશ્કેરાઇ જઇ તેં મારી સામે ફરિયાદ કેમ કરી તેમ કહી મારી નાંખવાની ધમકી આપી હતી. બીજી તરફ હાલ સુરત રહેતી પરિણીતાએ નિઝામપુરામાં રહેતા પતિ રેહાનખાન ડાહ્યાભાઇ પઠાણ સહિતના સાસરિયા સામે ફરિયાદ કરી હતી કે, તેમના લગ્ન 2019માં થયા હતા.

લગ્ન બાદ પતિ અને સાસરિયાએ દહેજના મામલે બોલાચાલી કરી મારામારી કરી હતી. પતિએ તલાક આપવાની માંગ કરી હતી અને શારિરીક માનસિક ત્રાસ આપ્યો હતો. પોલીસે બંને મામલે ગુનો નોંધી તપાસ શરુ કરી હતી.