વાતાવરણ:ફેબ્રુઆરી પ્રારંભે ગરમીનો પ્રકોપ, પારો 33.8 ડિગ્રી, આજે લઘુતમ તાપમાન 13 ડિગ્રી જેટલું રહેશે

જાન્યુઆરી મહિનાના અંતમાં કોલ્ડ વેવની અસર બાદ ફેબ્રુઆરી મહિનાની શરૂઆત થવાની સાથે જ ઠંડીમાં ઘટાડો નોંધાયો છે. દિવસ દરમિયાન મહત્તમ તાપમાનનો પારો 33.8 ડિગ્રી નોંધાયો હતો. જે સોમવારની સરખામણીમાં 1.8 ડિગ્રી વધારે હતો. જેના કારણે દિવસ દરમિયાન ગરમીનો અહેસાસ થયો હતો.

રાત્રીના સમયે ઠંડીનો પારો 13 ડિગ્રી નોંધાયો હતો, જેથી ઠંડીનો ચમકારો જોવા મળ્યો હતો. દિવસે ગરમી અને રાત્રી ઠંડીની બેવડી ઋતુનો અનુભવ છેલ્લા 2 દિવસથી શહેરીજનો કરી રહ્યા છે. પવનની ગતિમાં ઘટાડો થતાં ઠંડીમાં રાહત જોવા મળી રહી છે.

પવનની ગતિ 5 કિમીની ઝડપે ઉત્તર પશ્ચિમ દિશા તરફથી નોંધાઇ હતી. હવાનું દબાણ 1013.6 મિલિબાર્સ નોંધાયું હતું. સવારે ભેજનું પ્રમાણ 78 ટકા અને સાંજે 38 ટકા નોંધાયું હતું. બુધવારે લઘુતમ તાપમાનનો પારો 13 થી 14 ડિગ્રી રહે તેવી સંભાવના છે.