અટલાદરાના બિલ્ડર પિતા-પુત્રનું કારસ્તાન:11 ફ્લેટના બુકિંગના નામે રૂ 49 લાખ પડાવી લઇ અન્યોને વેચી દીધા

વાઘોડિયા તાલુકામાં રહેણાક બિલ્ડિંગની સ્કીમ મૂકી ફરિયાદી અને તેમના સંબંધી પાસેથી 11 ફ્લેટના બુકિંગ અને બાનાખત પેટે રૂા.49 લાખ પડાવનાર વડોદરાના બિલ્ડર પિતા-પુત્ર રશ્મીકાંત દવે અને જીગ્નેશ દવે સામે વાઘોડિયા પોલીસે છેતરપિંડીની ફરિયાદ દાખલ કરી છે.

વાઘોડિયા તાલુકામાં લક્ષ્મી એવન્યુ નામથી સાઈટ ચાલુ કરનારા બિલ્ડર પિતા-પુત્ર રશ્મીકાંત દવે અને જીગ્નેશ દવે (અક્ષર અમૃત ફ્લેટ, અટલાદરા-બિલ રોડ)ની સાઈટમાં ફરિયાદી રાકેશ ઉમેશચંદ્ર અગ્રવાલ (વલ્લભ ટાઉનશિપ, આજવા રોડ) અને તેમના બનેવી રોહિત ગોપાલદાસ અગ્રવાલ, ભરત ઓમપ્રકાશ અગ્રવાલે 8 ફ્લેટ રૂા. 37.30 લાખમાં ખરીદવાનો સોદો કર્યો હતો. ફરિયાદીએ બાનાખતના 34 લાખના બે ચેક આપ્યા હતા. વાઘોડિયા સબ રજિસ્ટ્રાર કચેરીમાં બાનાખાત કરી રજિસ્ટર કરાવી બિલ્ડર પિતા-પુત્રે ફ્લેટ 3 મહિનામાં આપવા કહ્યું હતું.

બિલ્ડરે વેચાણ દસ્તાવેજના અલગથી 5 લાખ પણ RTGS મારફતે એકાઉન્ટમાં લીધા હતા. ત્યારબાદ બિલ્ડર પિતા-પુત્રે ફ્લેટના દસ્તાવેજ માટે ગલ્લાં-તલ્લાં કર્યાં હતા. જેથી ફરિયાદીને શંકા જતા તેમણે મિલકત બાબતનો સર્ચ રિપોર્ટ કઢાવતાં તેમણે જે ફ્લેટ બુક કરાવ્યા હતા તે પૈકી એક ફ્લેટ વિજય ત્રિકમભાઈ પવાર (કમલાપાર્ક સોસાયટી, હરણી-વારસિયા રિંગ રોડ)ને બિલ્ડર જીગ્નેશ દવેએ બાનાખત કરી આપ્યો હોવાનું જાણવા મળ્યું હતું.

અન્ય એક ફ્લેટ મુકેશ શાહ નામના વ્યક્તિને બનાખાત કરી આપ્યા બાદ તેને રદ કરીને ફરીથી તે જ ફ્લેટ મુકેશ શાંતિલાલ શાહને બાનાખત કરી આપ્યો હતો. છતાં બિલ્ડર પિતા-પુત્રે 5 લાખ લીધા હતા. ફરિયાદ અનુસાર આરોપી પિતા-પુત્રે તેમની જાણ બહાર જ 8 ફ્લેટના બાનાખત રદ કરાવી નાખ્યાં હતા તેમજ આ ફ્લેટના રૂપિયા તેમણે લઈ લીધા હતા.

ફરિયાદીના સંબંધી સાથે પણ બિલ્ડર પિતા-પુત્રની ઠગાઈ
ફરિયાદીના સંબંધી નારાયણ અશોકભાઈ અગ્રવાલ (ગોખલેબાગ સોસાયટી, અકોટા) પાસે પણ બિલ્ડર પિતા-પુત્રે 3 ફ્લેટ રૂા.13.05 લાખમાં વેચાણ આપવાનું નક્કી કરીને રૂા.10 લાખ પડાવી લીધા હતા. જ્યારે નારાયણભાઈને વેચેલા ફ્લેટ આરોપીઓએ અલકાબેન પરવડિયાને વેચી દીધા હોવાનું જાણવા મળ્યું હતું.