દુર્ઘટના:બાથરૂમમાં ગિઝર ફાટતાં દાઝેલા નિવૃત્ત પગીનું મોત, નાહતી વેળા ઇલેક્ટ્રિક ગિઝર ધડાકાભેર ફાટ્યું

વાઘોડિયા રોડ પર શિવમપાર્ક સોસાયટીમાં રહેતા પાલિકાના નિવૃત પગી બાથરૂમમાં નાહવા ગયા ત્યારે અચાનક ઇલેક્ટ્રિક ગિઝર ફાટ્યું હતું. જેમાં ગંભીર રીતે દાઝી જતાં તેમનું સયાજી હોસ્પટલમાં સારવાર દરમિયાન મોત નીપજ્યું હતું. પોલીસે મૃતદેહને સયાજી હોસ્પિટલ ખાતે ખસેડી આગળની કાર્યવાહી હાથ ધરી હતી. શહેરના વાઘોડિયા રોડ પર અંબાલાલ પાર્કની પાછળ શિવમ પાર્ક સોસાયટી આવેલી છે. જ્યાં 62 વર્ષના મનહરભાઈ કિશનભાઇ કહાર રહેતા હતા. તેઓ વડોદરા પાલિકામાં પગી તરીકે નોકરી કરતા હતા અને હાલમાં નિવૃત્ત જીવન ગુજારતા હતા.

રવિવારે બપોરે તેઓ નાહવા માટે બાથરૂમમાં ગયા હતા તે સમયે એકાએક ઈલેક્ટ્રિક ગિઝર ધડાકા સાથે ફાટ્યું હતું. ગિઝર ફાટવાનો અવાજ આવતાં તેમના પરિવારજનો બાથરૂમ તરફ દોડી ગયા હતા અને બાથરૂમનો દરવાજો ખોલી મનહરભાઈને બહાર કાઢ્યા હતા. મનહરભાઈ ગંભીર રીતે દાઝી ગયા હોવાથી તેમને તાત્કાલિક સારવાર માટે સયાજી હોસ્પિટલ ખસેડાયા હતા. જ્યાં સારવાર દરમિયાન તેમનું સોમવારે સાંજે મોત નીપજ્યું હતું.