મોક ડ્રીલ:વડોદરાની ગોત્રી કોવિડ હોસ્પિટલના ICU-6માં આગની મોક ડ્રીલ યોજાઈ, કોરોનાના 5 દર્દીને રેસ્ક્યૂ કરાયા

વડોદરા શહેરની ગોત્રી કોવિડ હોસ્પિટલના ICU-6માં આજે આગની ઘટનાની મોક ડ્રીલનું આયોજન કરવામાં આવ્યું હતું. જેમાં 400થી વધુ કર્મચારીઓ આ મોક ડ્રીલમાં જોડાયા હતા.

રાજકોટની ખાનગી કોવિડ હોસ્પિટલના અગ્નિકાંડ બાદ હવે હોસ્પિટલો એલર્ટ થઈ
રાજકોટની ઉદય શિવાનંદ કોવિડ હોસ્પિટલમાં થયેલા અગ્નિકાંડ બાદ હવે રાજ્યભરમાં હોસ્પિટલો એલર્ટ થઈ ગઈ છે અને આગની ઘટના બને તે સમયે કેવી રીતે કામગીરી કરવી તે માટે મોક ડ્રીલનું આયોજન કરવામાં આવી રહ્યું છે, ત્યારે વડોદરા શહેરની ગોત્રી કોવિડ હોસ્પિટલમાં આજે મોક ડ્રીલનું આયોજન કરવામાં આવ્યું હતું. જેમાં આગ લાગે તે સમયે કેવી રીતે કામગીરી કરવી તે અંગેની તમામ તકેદારીઓ રાખવામાં આવી હતી.

મોક ડ્રીલમાં ICU-6માં આગનો બનાવ ઉભો કરવામાં આવ્યો હતો
વડોદરા શહેરની ગોત્રી કોવીડ હોસ્પિટલના નોડલ અધિકારી ડો, શિતલ મિસ્ત્રીએ જણાવ્યું હતું કે, મોક ડ્રીલમાં ICU-6માં આગનો બનાવ ઉભો કરવામાં આવ્યો હતો. જેમાં 5 દર્દીઓ હતા. જેમાં એક દર્દી ઓક્સિજન અને એક દર્દી વેન્ટિલેટર પર હતા. આગ લાગતા જ ફાયરના સાધનોનો ઉપયોગ કરીને આગ બુઝાવી દીધી હતી અને દર્દીઓને અલ્ટરનેટ ઓક્સિજન થેરાપી આપવામાં આવી હતી. એક પછી એક દર્દીની સ્થિતિ જાણીને સારવાર આપીને રિફર કરવામાં આવ્યા હતા.