લોકડાઉન:કોરોનાની મહામારીને કારણે અબુધાબીમાં વડોદરા સહિતના 50 યુવકો ફસાયા

શહેરના યુવાનોને મુંબઈના કોન્ટ્રાક્ટર દ્વારા અબુધાબીની ઇસકો કંપનીમાં કામ કરવા લઇ ગયો હતો. કોરોનાની મહામારીને કારણે કે અન્ય કારણોસર કંપની સંચાલકો દ્વારા કામ બંધ કરી દેવામાં આવ્યું છે. હવે વડોદરા 50 સહિતના લોકો પરત આવવા માગે છે, પરંતુ પાસપોર્ટ અને પૈસા બધું કોન્ટ્રાક્ટર પાસે હોવાના કારણે હવે સરકારી તંત્ર તરફથી મદદની રાહ જોઈ રહ્યા છે. અબુધાબીમાં ફસાયેલા અંકિતે પટેલે ટેલિફોનિક વાતચીતમાં જણાવ્યું હતું કે, માર્ચમાં અમે લોકો અહીંયાં આવ્યા હતા. મુંબઈની કન્સલ્ટન્સી કંપની દ્વારા અમારો ઇન્ટરવ્યૂ લઇને અમને અહીંયાં લાવવામાં આવ્યા હતા. અમે અબુધાબીમાં ઇસકો કંપનીમાં કામ કરતા હતા. અહીંયાં આવ્યા બાદ એક મહિના જેટલો સમય કામ કર્યું, બાદમાં અમને ઘરે બેસાડી દીધા છે. અત્યારે કંપની મેનેજમેન્ટ પૈસા પણ નથી આપતું કે ફરી ક્યારે કામ કરવાનું શરૂ કરવાનું છે તે અંગે કોઈ જાણકારી આપતું નથી. અમે આખો દિવસ ઘરમાં પસાર કરી રહ્યા છીએ. અમે અહીંયાં ફસાઈ ગયા છીએ.