હરિધામ ફરી ચર્ચામાં:સોખડા મંદિરમાં સંકુલમાં વયોવૃદ્ધ સેવિકાનું મોત, પલંગ પરથી પડી જતાં અવસાન થયાની આશંકા

વડોદરાએક મહિનો પહેલા
હરિધામમાં મહિલા સેવિકાનું પલંગ પરથી પડી જતા મૃત્યુ નીપજ્યું હોવાનું અનુમાન લગાવાઈ રહ્યું છે. - Divya Bhaskar
હરિધામમાં મહિલા સેવિકાનું પલંગ પરથી પડી જતા મૃત્યુ નીપજ્યું હોવાનું અનુમાન લગાવાઈ રહ્યું છે.
  • ગુણાતીત સ્વામીના આપઘાત બાદ આત્મીય કોલોનીમાં સેવિકાના મોતથી પોલીસ દોડતી થઈ

હરિધામ સોખડા મંદિરમાં ગુણાતીત સ્વામીના આપઘાતનું રહસ્ય હજી અકબંધ છે. તેવામાં હરિધામ સંકુલમાં એક વયોવૃદ્ધ સેવિકાના મૃત્યુની ઘટના સામે આવતા ફરી એક વાર પોલીસ દોડતી થઇ છે. હરિધામ સોખડા ગાદીના વિવાદને લઈને ભારે ચર્ચામાં છે. ત્યારે થોડા સમય અગાઉ હરિધામ સંકુલમાં પ્રબોધ સ્વામી જૂથના ગુણાતીત સ્વામીએ રહસ્યમય સંજોગોમાં આપઘાત કરી લેતા અનેક સવાલો ઉઠ્યા હતા. જોકે સમગ્ર મામલે પોલીસની ઢીલી તપાસને કારણે લાંબો સમય થયો હોવા છતાં ગુણાતીત સ્વામીના અપમૃત્યુની ઘટના પરથી પરદો ઊંચકાયો નથી. તેવામાં હરિધામ સંકુલમાં વધુ એક મૃત્યુની ઘટના પ્રકાશમાં આવતા ફરી એક વાર હરિધામ સંકુલમાં પોલીસના આંટાફેરા શરૂ થઈ ગયા છે.

પલંગ પરથી પડતાં મોત
મળેલી માહિતી મુજબ હરિધામ સંકુલમાં એક સેવિકાના મૃત્યુની ઘટના બનવા પામી છે. હરિધામ સંકુલમાં છેલ્લા ઘણા વર્ષોથી સેવા કરતા મૃદુલાબેન જયેશભાઈ શાહ નામના (ઉ.વ.82) વર્ષીય મહિલા સેવિકાનું પલંગ પરથી પડી જતા મૃત્યુ નીપજ્યું છે. મોડી રાત્રે મૃદુલાબેન આત્મીય કોલોનીમાં સેવિકાઓના નિવાસ્થાને પોતાના શયન કક્ષમાં ઊંઘતા હતા. દરમિયાન લગભગ રાત્રે 10 વાગ્યાના સુમારે પલંગ પરથી પડી જતા માથા તેમજ મોઢાના ભાગે ઇજાઓ પહોંચી હતી. મૃદુલા બેનને માથા તેમજ મોઢાના ભાગે ગંભીર પ્રકારની ઈજાઓ પોહોચતા તેમનું મોત નીપજ્યું હોવાનું હાલ પોલીસ દ્વારા પ્રાથમિક અનુમાન લગાવવામાં આવી રહ્યું છે.

નિવેદનો લેવાયા
મહત્વનું છે કે, હરિધામ સંકુલમાં વધુ એક મૃત્યુની ઘટનાની જાણ થતાંની સાથે જ પોલીસ ફરી એકવાર દોડતી થઈ છે. ત્યારે તાલુકા પોલીસ દ્વારા તપાસનો ધમધમાટ શરૂ કરી દેવામાં આવ્યો છે. મૃતદેહનો કબ્જો મેળવી પેનલ પોસ્ટ મોર્ટમ કરાવવાની પ્રક્રિયા હાથ ધરવામાં આવી છે. સાથે જ પોલીસ દ્વારા હરિધામ સંકુલમાં મૃતક મૃદુલાબેનની સાથે રહેતા તેમજ સંપર્કમાં રેહતા લોકોના નિવેદનો લેવાની પ્રક્રિયા હાથ ધરવામાં આવી છે.

ફરીથી મોતની ઘટના સામે આવતાં પોલીસના આંટાફેરા હરિધામમાં વધી ગયા છે.
ફરીથી મોતની ઘટના સામે આવતાં પોલીસના આંટાફેરા હરિધામમાં વધી ગયા છે.

મોતનું કારણ જાણવા પીએમ રિપોર્ટની રાહ
મહત્વનું છે કે, હરિધામ સંકુલમાં થોડા સમય અગાઉ ગુણાતીત સ્વામીના મૃત્યુ અંગે મંદિર સંચાલકો દ્વારા પોલીસને અંધારા રાખવમાં આવી હતી.પોલીસે હાથ ધરેલી તપાસ બાદ ગુણાતીત સ્વામીના પોસ્ટ મોર્ટમ રિપોર્ટમાં આપઘાત કર્યો હોવાનો ચોંકાવનારો ખુલાસો થયો હતો. ત્યારે હાલ તાલુકા પોલીસ દ્વારા મૃદુલા બહેનના પોસ્ટ મોર્ટમ રિપોર્ટની રાહ જોવાઇ રહી છે.મૃદુલા બહેનના મૃત્યુનું સાચું કારણ પોસ્ટ મોર્ટમ રિપોર્ટ આવ્યા બાદ જ જાણી શકાશે..

અન્ય સમાચારો પણ છે...