નિર્ણય:ત્રણેય સંતાનના બાયોલોજિકલ પિતા હોવાથી દીપકનું ફોર્મ રદ કરાયું

વાઘોડીયાના ધારાસભ્ય મધુ શ્રીવાસ્તવના પુત્ર દિપક શ્રીવાસ્તવે અપક્ષ ઉમેદવારી નોંધાવ્યાં બાદ ચૂંટણી અધિકારીએ રેકોર્ડ જોતાં દિપક શ્રીવાસ્તવ ત્રણ બાળકોના કુદરતી પિતા હોવાનું પુરવાર થતું હોઇ ફોર્મ રદ કર્યું હતુ. દિપક શ્રીવાસ્તવે ટિકિટ ન મળતા અપક્ષ ઉમેદવારી નોંધાવી હતી.

બીજી તરફ દિપક શ્રીવાસ્તવે ભલે એક સંતાનને દત્તક આપી દીધુ હોય પરંતુ તે ત્રણ સંતાનના પિતા હોવાના કારણે તેનું ફોર્મ મંજૂર થશે કે કેમ ? તે બાબત પહેલાથી જ ભારે ચર્ચાનો વિષય બની હતી. આજે ફોર્મ ચકાસણી હોવાના કારણે ફોર્મ કેમ રદ ન થઇ શકે અને ફોર્મ કેમ રદ કરવું જોઇએ ? તે બાબતે ચૂંટણી અધિકારી સમક્ષ બન્ને પક્ષે લાંબી દલીલો કરવામાં આવી હતી. બન્ને પક્ષે રજૂઆત થયા બાદ ચૂંટણી અધિકારીએ જન્મ મરણ શાખાના રજિસ્ટ્રારને ઓરિજનલ ડોક્યુમેન્ટ સાથે હાજર રહેવાનો આદેશ કર્યો હતો.

રજિસ્ટ્રાર દ્વારા રજૂ થયેલા પુરાવામાં દિપક શ્રીવાસ્તવના ત્રણ સંતાનો હોવાની વિગતો રજૂ કરી હતી એટલે ચૂંટણી અધિકારીએ દિપક શ્રીવાસ્તવ ત્રણ બાળકોના કુદરતી પિતા હોવાનું રેકોર્ડમાં સ્પષ્ટ જણાતંુ હોઇ દિપક શ્રીવાસ્તવનું ફોર્મ રદ કર્યું હતું.