ક્રાઈમ:પાણીની લાઇન તોડનાર કંપની સામે ફરિયાદ, ~15 લાખ વસૂલવા નોટિસ

વડોદરાએક વર્ષ પહેલા
  • કૉપી લિંક
  • માંજલપુરમાં ગુરુવારે સાંજે પાઇપ તૂટી જતાં નાગરિકોને પાણી નહોતું મળ્યું

માંજલપુર ગામમાં ગુરુવારે મોડી સાંજે એરટેલ ટેલીસોનિક કેબલ કંપનીએ પોતાની કામગીરી દરમિયાન કોર્પોરેશનની પાણીની પાઈપ તોડી નાખતાં ગામના રહેવાસીઓને પાણી મળ્યું ન હતું. આ ઘટના બાદ વડોદરા કોર્પોરેશન દ્વારા કંપનીના પ્રતિનિધિ મોહિત રાઠોડ અને ઈજારદાર જીગર શાહ વિરુદ્ધ માંજલપુર પોલીસ સ્ટેશનમાં ફરિયાદ નોંધવાની કાર્યવાહી હાથ ધરી હતી. જ્યારે પાલિકાએ રૂ.15 લાખની નુકસાની વસૂલ કરવા એરટેલ ટેલીસોનિકને નોટિસ મોકલી છે.

પાલિકા દ્વારા પાઇપનું રિપેરિંગ શરૂ કરાવી નુકસાની વસૂલવા કાર્યવાહી કરાઈ
પાલિકાના જનસંપર્ક અધિકારી દ્વારા જણાવવામાં આવ્યું હતું કે, વહીવટી વોર્ડ નંબર 4(ડી) માંજલપુર ગામથી સ્મશાન તરફ જવાના રસ્તે કાશીવિશ્વનાથ કોમ્પ્લેક્સ પાસે ગુરુવારે સાંજે એરટેલ ટેલીસોનિક દ્વારા એચડીડી બોરિંગ-ખોદકામ કરી 5 ફૂટ ઊંડી તેમજ 8 અને 10 ડાયામીટરવાળી પાણીની પાઈપ તોડી નાખી હતી. જેના કારણે માંજલપુર ગામ વિસ્તારના લોકોને તરસ્યા રહેવું પડ્યું હતું અને પાણીનો વેડફાટ થયો હતો.

આ સમગ્ર ઘટના પાલિકાની દક્ષિણ ઝોનની કચેરીના ધ્યાન પર આવતાં પાલિકાએ રિપેરિંગની કામગીરી ચાલુ કરાવી હતી. બીજી તરફ એરટેલ ટેલીસોનિક દ્વારા જે નુકસાન પહોંચાડાયું તે મામલે તેને પ્રતિનિધિ મોહિત રાઠોડ અને સ્થળ ઉપર કામગીરી કરતા ઈજારદાર જીગર શાહ વિરુદ્ધ પોલીસ ફરિયાદ કરવાની કાર્યવાહી કરવામાં આવી હતી. જ્યારે પાલિકાને થયેલા રૂ.15 લાખની નુકસાનીની રકમ વસૂલ કરવા માટે એરટેલ ટેલીસોનિકને નોટિસ મોકલવામાં આવી છે. મોડી રાત સુધી માંજલપુર પોલીસ સ્ટેશનમાં આ અંગે ફરિયાદ દાખલ કરવાની કામગીરી ચાલુ રહી હતી. અત્રે ગુરુવારે સાંજે પાણીની પાઇપ લાઇન તૂટી જતાં હજારો લિટર પાણી રોડ પર વહી ગયું હતું. જ્યારે બીજી તરફ માંજલપુર ગામના નાગરિકોને પાણી વિના રહેવું પડ્યું હતું.

અન્ય સમાચારો પણ છે...