વાતાવરણ:કોલ્ડવેવના પગલે આજે ઠંડીનો પારો 120 રહેશે, ઠંડા પવનોની અસરથી ઠંડીની તીવ્રતા વધી

શહેરમાં ઠંડા પવનોને પગલે સોમવારથી ઠંડીની તીવ્રતામાં વધારો થાય તેવું અનુમાન હવામાન શાસ્ત્રીઓ કરી રહ્યા છે. 31 ડિસેમ્બર સુધીમાં શહેરમાં કોલ્ડવેવ રહેવાની આગાહી હવામાન વિભાગે પહેલેથી જ આપી છે.હવામાન શાસ્ત્રી અંકિત પટેલના મતે વડોદરામાં 31 ડિસેમ્બર સુધી કોલ્ડવેવની અસરના પગલે પારો 10 ડિગ્રીથી પણ નીચે જઈ શકે છે. વડોદરામાં 2018માં 29 ડિસેમ્બરે પણ કોલ્ડવેવના પગલે પારો 7 ડિગ્રી નોંધાયો હતો. બે વર્ષ બાદ 2020માં પણ પારો સિંગલ ડિજિટમાં પહોંચી શકે છે.

હવામાન વિભાગના જણાવ્યા મુજબ શહેરમાં 27 ડિસેમ્બરના રોજ મહત્તમ તાપમાનનો પારો 29.2 ડિગ્રી જ્યારે લઘુતમ તાપમાનનો પારો 16 ડિગ્રી નોંધાયો હતો. ભેજનું પ્રમાણ સવારે 86 ટકા અને સાંજે 37 ટકા નોંધાયું હતું. જ્યારે ઉત્તર-પશ્ચિમ દિશાથી 9 કિમીની ઝડપે પવન ફૂંકાયો હતો. 28 ડિસેમ્બરના રોજ પારો 12 ડિગ્રી રહેવાની શકયતા છે.