ભાસ્કર વિશેષ:કાર્યકરોને બ્રેડબટર; ચૂંટણીમાં પ્રચારકોને રાત-દિવસ દોડાવવા રૂ.90નું ઉંધિયું, રૂ.20નું સમોસું ખવડાવી શકાશે

વિધાનસભાની ચૂંટણીને લઈને ઉમેદવારો બે રોકટોક ખર્ચ કરતા હોય છે ત્યારે તેના પર નિયંત્રણ માટે પંચે ચોક્કસ રકમ નક્કી કરી છે. વડોદરા ખાતે ચૂંટણીના કાર્યાલયો પર જતા કાર્યકર્તાઓ માટે કરવામાં આવતી તમામ વ્યવસ્થાઓના ખર્ચ પર નિયંત્રણ આવ્યું છે. જેને પગલે હવે ઉમેદવારો માટે મહિના સુધી પ્રચાર કરવામાં પરસેવો પાડતા કાર્યકરોને તંદુરસ્ત રાખવામાં કરવામાં આવતા ખર્ચની રકમ નાદુરસ્તી ફેલાવે તેવી હોવાનું ફળીભૂત થયું છે. કાર્યાલયો પર કરવામાં આવતા ખર્ચ માટેનું હવે ઉમેદવારે રજીસ્ટર બનાવી પંચ સમક્ષ રજૂ કરવું પડશે.

ઉમેદવારોના પ્રચાર માટે આવતા કાર્યકરોને પ્રચાર માટે થતો ખર્ચ, કાર્યાલયમાં થતા ચા-પાણી, નાશ્તા, જમવાના ખર્ચ ઉમેદવારોએ રજિસ્ટરમાં નોંધવો પડશે. ઉમેદવાર હવે તેનો કુલ ચૂંટણી ખર્ચ 40 લાખ રૂપિયાથી વધુ નથી કરી શકવાનો ત્યારે પ્રચાર સામગ્રી, પેટ્રોલ અને ખાણીપીણી સહિત ફરાસખાનાનો ખર્ચ કેવીરીતે ઘટાડે તે સૌથી મોટી ચેલેન્જ છે. ઉમેદવારો પોતાના ખર્ચને કોઈપણ રીતે છુપાવી શકશે નહિ અને તેના માટે જે તે રાજકીય પક્ષો દ્વારા પણ ચોક્કસ સમિતિની રચના કરી દેવાઇ છે. ઉમેદવારોના ખર્ચ ઉપર પર ચૂંટણી પંચની ખર્ચ નિરીક્ષણ સમિતિ જોશે. ત્યારે ઉમેદવાર વધારાની રકમ કોઈપણ ખર્ચ મુદ્દે દર્શાવી શકશે નહિ.