તપાસ:અસલમ બોડિયાએ ઘરના રિનોવેશન માટે 20 લાખની લોન લઈ માત્ર 40 હજાર ભર્યા

ગુજસીટોકના કાયદા હેઠળ પકડાયેલા કુખ્યાત ખંડણીખોર અસલમ બોડિયાની મકાનના રિનોવેશન નામે રૂ. 20 લાખની લોન લીધા બાદ તેના હપ્તા ન ભર્યા હોવાનું તપાસમાં સપાટી પર આવતાં પોલીસે તે દિશામાં તપાસ હાથ ધરી છે.

ક્રાઇમ બ્રાન્ચની ટીમે વડોદરા શહેરમાં હત્યા, હત્યાનો પ્રયાસ, લૂંટ અને ખંડણી જેવા ગંભીર ગુનાઓ આચરનાર બીચ્છુ ગેંગ સામે ક્રાઇમ બ્રાન્ચની ટીમે ગુજસીટોકના ગુના હેઠળ કાર્યવાહી હાથ ધરી હતી. ક્રાઇમ બ્રાન્ચની ટીમે બીચ્છુ ગેંગના અસલમ બોડીયાને બોડેલીના છૂછાપુરા ખાતેની દરગાહ પરથી ઝડપી પાડી તેના 15 દિવસના રિમાન્ડ મેળવ્યા હતા અને સઘન પૂછપરછ હાથ ધરી છે.

પોલીસ દ્વારા અસલમની મિલકત અને તેની બેનામી સંપત્તિ અંગે તપાસ હાથ ધરવામાં આવી છે. અસલમ બોડિયાએ શહેરના નવાપુરામાં તેના મકાનના રિનોવેશન માટે બોમ્બે મર્કન્ટાઇલ કો.ઓ.બેન્કમાંથી રૂ. 20 લાખની લોન લીધી હતી. ત્યારબાદ તેણે આ લોનના હપ્તાના માત્ર રૂ. 40 હજાર જ ભર્યા હતા. પોલીસની તપાસમાં આ બાબત સામે આવતાં જ ક્રાઇમ બ્રાન્ચે બેંકના મેનેજરને લોનના દસ્તાવેજ સાથે બોલાવ્યા છે. જે દસ્તાવેજોના આધારે પોલીસ આગળની કાર્યવાહી હાથ ધરશે.