અપૂરતુ પાણી:પાણીની સમસ્યા અંગે દરેક વોર્ડમાં સરેરાશ 5 થી 10 ફરિયાદો મળી, ઇજનેરને મોબાઈલ પર ફરિયાદ કરી શકાશે

ઉનાળાની સિઝન શરૂ થઈ છે ત્યારે પાણીની ફરિયાદો વધે તે પહેલાં પાલિકાનું તંત્ર એક્શનમાં આવતાં દરેક વોર્ડમાં સરેરાશ 5 થી 10 ફરિયાદો મળી હતી. જેમાંયે પાણી પુરવઠા વિભાગના વડા અધિકારીને બીજા વિસ્તારોમાંથી અપૂરતા પાણીની ફરિયાદો મળી હતી.

પૂર્વ અને દક્ષિણ વિસ્તાર પૂરતી સિમીત રહેલી પાણીની સમસ્યા બીજા વિસ્તારોમાં ન ફેલાય તેના માટે આયોજન કરવા પાણી પુરવઠા વિભાગે જોર લગાવ્યું છે. જેના ભાગરૂપે પાણીની ફરિયાદો લોકો ટોલ ફ્રી નંબર 1800 233 0265 પર કરી શકે છે. આ સિવાય 12 વહીવટી વોર્ડમાં વોર્ડ દીઠ આસી. ઈજનેર કે અ.મદદનીશ ઇજનેરને મોબાઈલ પર ફરિયાદ કરી શકાશે. જ્યારે 4 ડે. ઇજનેરને ઝોન ફાળવ્યા છે. પાણી પુરવઠાના વડા અમૃત મકવાણાએ પૂર્વ ઝોનની ફરિયાદો પર નજર રાખવા બાગડોર હાથમાં રાખી છે. પહેલા દિવસે તેમને ઉત્તર અને દક્ષિણ ઝોનમાંથી અપૂરતા પાણી મામલે ફરિયાદો મળી હતી.