વાહનની ટક્કરે મોત:આજવા ચોકડી બ્રિજ ઉપર વાહનની ટક્કરે યુવકનું મોત, સમાના યુવકને અજાણ્યા વાહને ટક્કર મારી

આજવા ચોકડી પાસેના બ્રિજ પર સુરતના બાઇકસવાર યુવકનું અજાણ્યા વાહનની ટક્કરે મોત નિપજ્યું હતું.મૂળ સુરતના વરાછા રોડ પરના ભક્તિનગરમાં રહેતો અને હાલમાં સમાના અભિલાષા ચાર રસ્તા પાસેના કેનાલ રોડ પર આવેલી શ્યામવાટિકા સોસાયટીમાં પોતાના કુટુંબ સાથે રહેતો હરેશ ઉકા પ્રજાપતિ (ઉવ.30) બપોરે પોતાની બાઇક પર ઘરે જમવા જઇ રહ્યો હતો. દરમિયાન આજવા ચોકડી પરના બ્રિજ પર અજાણ્યા વાહને તેની બાઇકને ટક્કર મારી હતી અને તેના શરીર પર વાહન ચઢાવી દેતાં માથા સહિત શરીરના વિવિધ ભાગે ગંભીર ઇજાઓ થતાં તેનું ઘટના સ્થળે જ પ્રાણપંખેરું ઊડી ગયું હતું.

ઘટનાની જાણ બાપોદ પોલીસને કરવામાં આવી હતી. પોલીસના જણાવ્યા મુજબ તે વાઘોડિયા રોડ પાસે મિસ્ત્રી કામ કરતો હતો અને બપોરે જમવા ઘરે પરત જતાં આ અકસ્માત સર્જાયો હતો. તેના ખિસ્સામાંથી મળી આવેલા ડ્રાઇવિંગ લાઇસન્સના આધારે તેની ઓળખ થતાં સુરત તેના ભાઇને અને વડોદરામાં રહેતી તેની પત્નીને જાણ કરવામાં આવી હતી. પોલીસે અકસ્માત કરનાર અજાણ્યા વાહનની શોધખોળ હાથ ધરી છે.બનાવના સંબંધમાં પોલીસે વિવિધ લોકોની પુછપરછ શરૂ કરી છે