ધરપકડ:મેદાનમાં કારમાં દારૂની પાર્ટી કરતાં 9 ખેડૂત ઝબ્બે, સુરતથી લગ્ન પ્રસંગમાં વડોદરા આવ્યા હતા

શહેરના સમા-સાવલી રોડ પર લીલેરિયા એપાર્ટમેન્ટની પાછળ ગ્રાઉન્ડમાં કારમાં ચાલતી દારૂની મહેફિલ પર પોલીસે દરોડો પાડી નશાની હાલતમાં 9 શખ્સોની અટકાયત કરી હતી. લીલેરિયા એપાર્ટમેન્ટની પાછળ ગ્રાઉન્ડમાં 2 કાર પાર્ક કરી છે અને તેમાં કેટલાક ઇસમો દારૂની મહેફિલ માણી રહ્યા છે, તેવી બાતમીથી પોલીસે દરોડો પાડતાં દારૂડિયાઓમાં નાસભાગ મચી હતી.

સમા પોલીસે ઓલપાડ તાલુકાના સરોલી ગામના પ્રમોદ ઘેલાભાઈ પટેલ, અનિલકુમાર જશવંતભાઈ પટેલ, રાજેશ રામભાઈ પટેલ, હિરેનકુમાર સંતુભાઈ પટેલ, નિરંજન જયંતીભાઈ પટેલ, દલસુખ મનસુખભાઇ પટેલ, જયંત ભગવતીભાઈ પટેલ, જનક ગણપતભાઈ પટેલ, જયેશ બળવંતભાઈ પટેલને ઝડપી લીધા હતા. કારમાંથી વિદેશી દારૂની બોટલ મળતાં પોલીસે તમામની અટકાયત કરી હતી. પોલીસે 2 કાર સહિત કુલ રૂ. 7 લાખની મતા જપ્ત કરી હતી. પોલીસ અનુસાર તમામ લોકો ખેડૂત છે, તેઓ વડોદરામાં લગ્ન પ્રસંગમાં આવ્યા હતા.