ફ્લાઇટ શરૂ:વડોદરાથી 9 ડોમેસ્ટિક ફ્લાઇટ કાર્યરત થશે, 28 માર્ચથી જયપુર તેમજ ચેન્નાઈની ફ્લાઇટ શરૂ થશે

વડોદરા એરપોર્ટથી આગામી 28 માર્ચથી જયપુર અને ચેન્નાઈ માટે ડેઇલી ફ્લાઇટ શરૂ થશે. આ સાથે વડોદરા એરપોર્ટ પર કુલ 9 ડોમેસ્ટિક ફ્લાઇટ શિડ્યૂલ કાર્યરત થશે. કોરોના મહામારી અગાઉ વડોદરા એરપોર્ટથી 11 જેટલી ફ્લાઇટ કાર્યરત હતી.

વડોદરા એરપોર્ટ સત્તાધીશો મુજબ આગામી એપ્રિલ મહિનામાં દિલ્હી માટે એર ઇન્ડિયાની સવારની ફ્લાઈટ શરૂ થવા કવાયત હાથ ધરવામાં આવી છે. આ સાથે અન્ય ફ્લાઇટ પણ એપ્રિલ મહિનામાં શરૂ થાય તેવા એંધાણ વર્તાય છે. જેને પગલે કોરોના મહામારી પૂર્વે જેવી સ્થિતિ એરપોર્ટ પર થશે અને વડોદરા એરપોર્ટ મુસાફરોથી ધમધમતુ થશે.

વડોદરાથી શરૂ થનારી ચેન્નાઈની ફ્લાઇટ 11:25 વાગે ચેન્નાઈથી ઉપડી 1:45 વાગે વડોદરા આવશે. બપોરે 2 વડોદરાથી ઉપડી 4:40 વાગે ચેન્નાઈ પહોંચશે. જ્યારે જયપુર ફ્લાઇટ 1:00 વાગે જયપુરથી ઉપડી બપોરે 2:45 વડોદરા આવશે. 3.20 વાગે વડોદરાથી ઉપડી 5 વાગે જયપુર પહોંચશે.