કાર્યવાહી:રહેણાક પ્રોપર્ટીમાં મંજૂરી વિના બનેલી 3 દુકાન સીલ

હરણી સંગમ ચાર રસ્તા પાસેની એક સોસાયટીમાં રહેણાંક પ્રોપર્ટીમાં મંજૂરી વિના બનેલી ત્રણ દુકાનો પાલિકાએ સીલ કરી હતી.પૂર્વ ઝોનના વહીવટી વોર્ડ 2માં સમાવિષ્ટ સંગમ ચાર રસ્તાથી હરણી-વારસિયા રિંગ રોડ પર આવેલી આકાશદીપ સોસાયટીના મકાન નંબર 15માં પરવાનગી લીધા વિના કોમર્શિયલ ઉપયોગ થતો હોવાની પાલિકાને ફરિયાદ મળી હતી. આ સ્થળે 3 દુકાનોનું બાંધકામ કર્યું હોવાની વિગતો તંત્રને ધ્યાને આવતાં ટીડીઓ ડિપાર્ટમેન્ટના વડા જીતેશ ત્રિવેદીની સૂચનાથી બિલ્ડિંગ ઇન્સ્પેક્ટર કેયુર મિસ્ત્રી સહિતનો સ્ટાફ, દબાણ શાખા તથા વારસિયા પોલીસ મથકનો કાફલો ઘટનાસ્થળે પહોંચ્યો હતો અને મા ફાર્મસી, હેર સલૂન અને લેડીઝ ટેલરની 3 દુકાન સીલ કરી હતી.

શહેરમાં અસંખ્ય દુકાનો અને કોમર્શિયલ કોમ્પ્લેક્સ રહેઠાણ વિસ્તારમાં બની ગયા છે, પણ પાલિકા દ્વારા ચોક્કસ નીતિ નક્કી કરાતી નથી. રહેણાંક વિસ્તારમાં મંજૂરી િવના અનેક વ્યાપારિક સંકુલો અને દુકાનો થઈ જાય છે, પરંતુ પાલિકા કાર્યવાહી કરતી નથી. જ્યારે રહેણાંક જગ્યામાં દુકાનો શરૂ થઈ ગયા પછી તેના વિરોધમાં રહીશો રજૂઆત કરે અને મામલો સીએમ ઓનલાઇન સુધી પહોંચે તે બાદ જ પાલિકા એક્શનમાં આવે છે.