રાજ્યના સૌથી લાંબા બ્રિજનો ડ્રોનનો નજારો:વડોદરામાં 230 કરોડના ખર્ચે બન્યો 3.5 કિ.મી.નો ફ્લાયઓવર, 148 પિલર પર ઉભો છે આ લોંગેસ્ટ બ્રિજ

વડોદરા શહેરના ગેંડા સર્કલથી મનીષા ચોકડી સુધીના ગુજરાતના સૌથી લાંબા 3.5 કિલોમીટરના ફ્લાયરઓવર બ્રિજની કામગીરી પૂર્ણતાના આરે છે. આગામી દિવસોમાં આ બ્રિજનું લોકાર્પણ થશે. ડ્રોન વીડિયોમાં રાજ્યના આ લોંગેસ્ટ બ્રિજનો અદભૂત નજારો જોવા મળ્યો હતો. વડોદારાના મેયર કેયુર રોકડિયાએ જણાવ્યું હતું કે, મનિષા ચોકડીથી લઈને ગેંડા સર્કલ સુધી ગુજરાતના સૌથી લાંબા ફ્લાયઓવરનું ગણતરીના દિવસોમાં લોકાર્પણ થશે. બ્રિજ નીચે લાઇટીંગ કરવામાં આવશે. આ ઉપરાંત ગાર્ડનિંગ પણ કરવામાં આવશે.

5 મિનિટમાં ગેંડા સર્કલથી અક્ષર ચોક પહોંચી શકાશે
વડોદરા શહેરમાં છેલ્લા પાંચ વર્ષથી 230 કરોડ રૂપિયાના ખર્ચે ગેંડા સર્કલથી મનીષા ચોકડી સુધી ફ્લાયઓવર તૈયાર થઈ રહ્યો છે અને કામગીરી પૂર્ણતાને આરે આવી ગઈ છે, ત્યારે ફતેગંજથી અક્ષર ચોક તરફ જતા વાહન ચાલકોને ફતેગંજ ફ્લાય ઓવર, શાસ્ત્રી રેલવે ફ્લાયઓવર બાદ ગેંડા સર્કલથી મનીષા ચોકડી સુધી ત્રીજા બ્રિજની ભેટ મળશે. વડોદરામાં 3.5 કિમીના ફ્લાયઓવરથી માત્ર 5 મિનિટમાં ગેંડા સર્કલથી અક્ષર ચોક પહોંચી શકાશે અને ઇંધણની બચત થશે.

બ્રિજમાં 3.52 કરોડ કિલો સિમેન્ટ વપરાઈ
10200 મેટ્રિક ટન સ્ટીલની સરખામણી મકાનમાં કરવામાં આવે તો 20.40 લાખ ચોરસ ફૂટનું બાંધકામ થઈ શકે છે અને 500 ચોરસ ફૂટના એક મકાન મુજબ 4080 મકાન બની શકે છે. વડોદરા શહેરનો આ પ્રથમ ફ્લાયઓવર એવો છે કે, જ્યા સર્કલના વળાંકમાં ઊતરવા માટે અને ત્યાંથી ચડવા માટે બંને બાજુ એન્ટ્રી અને એક્ઝિટની વ્યવસ્થા થશે. ગેંડા સર્કલથી શરૂ થતાં આ ફલાય ઓવરમાં વડીવાડી, રેસકોર્સ, અલકાપુરી, ચકલી સર્કલ, શિવમહલ, રોકસ્ટાર, દિવાળીપુરા તરફ ઉતાર અને ચઢાવ માટે 50 મીટર પહેલા સ્લોપ આપવામાં આવ્યો છે.

4080 મકાન બને એટલુ સ્ટીલ વપરાયું
ફ્લાયઓવરમાં ઉપયોગમાં લેવામાં આવેલ 10,200 મેટ્રિક ટન સ્ટીલની સરખામણી મકાનમાં કરવામાં આવે તો 20.40 લાખ ચોરસ ફૂટનું બાંધકામ થઈ શકે છે અને 500 ચોરસ ફૂટના એક મકાન મુજબ 4080 મકાન બની શકે છે. તેવી જ રીતે સિમેન્ટનો પણ 35,200 મેટ્રિક ટન ઉપયોગ થઈ રહ્યો છે, ત્યારે મકાનમાં આટલો સિમેન્ટનો વપરાશ 14.08 લાખ ચોરસ ફૂટમાં થઈ શકે છે. જો એક મકાન 500 ચોરસફૂટનું ગણવામાં આવે તો તેવાં 2816 મકાન આટલા સિમેન્ટથી બની શકે છે.

ઉલ્લેખનીય છે કે, 148 પિલર ફ્લાયઓવર માટે ઊભા કરાયાં છે. ગેંડા સર્કલથી મનીષા ચોકડી સુધીના 3.5 કિલોમીટરના વિસ્તારને આવરી લેતો ફલાય ઓવર બ્રિજ માત્ર શહેરનો જ નહીં પણ રાજ્યનો પણ સૌથી લાંબો ફલાયઓવર છે.

વિકાસ કામો પર બ્રેક વાગી
વડોદરા શહેરમાં નિર્મણાધીન ગેંડા સર્કલથી મનીષા ચોકડી સુધીનો 3.5 કિલોમીટરનો ફ્લાય ઓવર બ્રિજ પૂર્ણ કરવા માટે વડોદરા કોર્પોરેશન દ્વારા અન્ય વિકાસ કામો માટેની ગ્રાન્ટ ફાળવી દેતા શહેરના અન્ય વિકાસ કામો ઉપર બ્રેક વાગે તવી સ્થિતિ સર્જાઈ છે. રૂપિયા 230 કરોડના આ પ્રોજેક્ટ પાછળ સરકારે માત્ર રૂપિયા 76 કરોડની જ ગ્રાન્ટ ફાળવી છે. પરિણામે કોન્ટ્રાક્ટરને અન્ય ગ્રાન્ટની રકમમાંથી નાણાં ચૂકવવાનો વખત આવતા વિકાસ કામો ઉપર બ્રેક વાગી છે.

બ્રિજના રંગરોગાનની કામગીરી
વડોદરા શહેરના ગેંડા સર્કલથી મનીષા ચોકડી સુધીનો કામગીરીમાં વિલંબના પગલે ભારે વિવાદમાં રહ્યો છે. જોકે, આ બ્રિજનું કામ પૂર્ણતા આરે છે. બ્રિજને રંગરોગાન કરી આખરી ઓપ આપવામાં આવી રહ્યો છે. રાજ્યના સૌથી લાંબા આ ઓવર બ્રિજ બનાવવાની જાહેરાત રાજ્ય સરકારે વર્ષ 2017માં વિધાનસભા ચૂંટણી પહેલાં કરી હતી. 3.5 કિલોમીટર લાંબા ઓવરબ્રિજ 3 વર્ષમાં બનાવવાનો હતો.

ટ્રાફિકનું ભારણ ઓછું થશે
કોરોના અને નાણાકીય પરિસ્થિતિ બાદ કર્યા પછી પણ બ્રિજની કામગીરી પૂર્ણ કરવામાં અંદાજે બે વર્ષનો વિલંબ થયો છે. જેના કારણે વાહન ચાલકો તેમજ સ્થાનિક લોકો છેલ્લા 6 વર્ષથી મુશ્કેલીનો સામનો કરી રહ્યા છે. હવે આખરે બ્રિજ બનીને તૈયાર થઈ જતા ટ્રાફિકનું ભારણ ઘટવાનું છે. તો બીજી તરફ સ્થાનિક વહીવટી તંત્ર રાજ્ય સરકાર પાસેથી ગેંડા સર્કલ બ્રિજ માટે જરૂરી રકમની ગ્રાન્ટ મેળવવામાં નિષ્ફળ જતા શહેરના વિકાસ કામો ઉપર તેનું ભારણ આવ્યું છે.

અલાયદી ગ્રાન્ટ ફાળવવા રજૂઆત
રૂપિયા 230 કરોડના આ પ્રોજેક્ટ માટે રાજ્ય સરકાર તરફથી માત્ર રૂપિયા 76 કરોડની ગ્રાન્ટ મળી છે. અગાઉ આ બ્રિજની કામગીરી અટકતા રાજ્ય સરકારે 100 કરોડની ગ્રાન્ટ આપવાની જાહેરાત કરી હતી. પરંતુ હજુ સુધી વડોદરા મનપાને તે જાહેરાતની રકમ મળી નથી. રાજ્ય સરકાર તરફથી શહેરમાં નવા બ્રીજો માટે રૂપિયા 104 કરોડની સ્વર્ણિમ ગુજરાત ગ્રાન્ટ ફાળવવામાં આવી છે. જે ગ્રાન્ટ થકી કોન્ટ્રાક્ટરને અત્યાર સુધી 170 કરોડની રકમ ચૂકવી છે. જેથી ફરી એક વખત મ્યુનિસિપલ કમિશનર, મેયર સહિતના હોદ્દેદારોએ સરકારને રજૂઆત કરી બ્રિજ અંગે અલાયદી ગ્રાન્ટ ફાળવવાની માંગ કરી છે.

વિકાસ રૂંધાઇ જશે
બ્રિજના નાણાં સ્વર્ણિમ ગ્રાન્ટમાંથી વપરાતા કોંગ્રેસના કાઉન્સિલરે સત્તાધીશો અને રાજ્ય સરકાર પર પ્રહાર કર્યા છે કે રોડ, રસ્તા, પાણી અને ડ્રેનેજના કામ માટે સ્વર્ણિમ ગ્રાન્ટ વાપરવાની હોય છે, પણ પાલિકા ગ્રાન્ટ બ્રિજ પાછળ જ વાપરતા શહેરના અન્ય કામોમાં રુકાવટ ઉભી થશે. કોંગ્રેસે એવા પણ આક્ષેપો કર્યા છે કે, બ્રિજની કામગીરી પૂર્ણ કરવામાં કોર્પોરેશન દ્વારા જે શહેરના વિકાસલક્ષી કામોની ગ્રાન્ટ ખર્ચ કરી નાંખવાના કારણે કોર્પોરેશને શહેરનો વિકાસ રૂંધાઇ જશે.

પે એન્ડ પાર્કિંગની માસિક અપસેટ વેલ્યુ 4 લાખ 51 હજાર 900 રૂપિયા
સાડા ત્રણ કિલોમીટરના આ ફ્લાયઓવરના લોકાર્પણ પહેલા જ વડોદરા મ્યુનિસિપલ કોર્પોરેશને બ્રિજ નીચે પે એન્ડ પાર્કિંગ માટે ઇજારાઓ મંગાવ્યા છે. જેમાં જણાવાયું છે કે, આ બ્રિજની નીચેની ખુલ્લી જગ્યામાં પે એન્ડ પાર્કનો ઇજારો માસિક લાયસન્સ ફીથી એક વર્ષની મુદત માટે જાહેર હરાજીથી આપવાનો છે. મિનિમમ અપસેટ વેલ્યુ માસિક 6 લાખ 51 હજાર 900 રૂપિયા તથા ડિપોઝિટ 13 લાખ 3 હજાર 800 રૂપિયા રાખવામાં આવી છે. ઇજારો મેળવવા ઇચ્છુકોએ આગામી 22 ડિસેમ્બર સુધીમાં અરજી કરવાની રહેશે.