ગુજસીટોક:બિચ્છુ ગેંગના 23મા ગુંડાની છોટાઉદેપુર ખાતેથી ધરપકડ

ક્રાઈમ બ્રાંચ દ્વારા બિચ્છુ ગેંગના 23મા આરોપીની છોટાઉદેપુર ખાતેથી ગુજસીટોક હેઠળ ધરપકડ કરાઈ છે. ક્રાઈમ બ્રાંચ દ્વારા ગુજસીટોક હેઠળ બિચ્છુ ગેંગના કુલ 26 આરોપીઓ સામે ગુનો દાખલ કરવામાં આવ્યો છે. જેમાં અત્યાર સુધી કુલ 23 આરોપીઓની ધરપકડ કરવામાં આવી છે. ઉલ્લેખનિય છે કે, 1998થી શહેરમાં હત્યા, હત્યાની કોશિશ, ખંડણી, અપહરણ, ધાકધમકી સહિતના ગંભીર ગુના આચરી શહેરની જનતાને રંજાડી રહેલા કુખ્યાત બિચ્છુ ગેંગના અસલમ બોડિયા અને તેના 25 સાગરીતો સામે ક્રાઇમ બ્રાન્ચમાં ગુજસીટોકનો ગુનો નોંધાયો હતો.

ક્રાઈમ બ્રાંચના એસીપી ડી.એસ. ચૌહાણના જણાવ્યા અનુસાર, ક્રાઈમ બ્રાંચમાં નોંધાયેલા ગુજસીટોકના ગુના હેઠળ આરોપી મોહસીન ઉર્ફે ડોન ઝહીરમીયા શેખ (રહે. નાની છીપવાડ, યાકુતપુરા)ને છોટાઉદેપુરથી દબોચી લેવામાં આવ્યો છે. આ પહેલાં નામચીન અજ્જુ શેખ અને ઇરફાન ઉર્ફે ખન્નાને ક્રાઇમ બ્રાન્ચે યાકુતપુરામાંથી ઝડપી લીધા હતા. હજુ બિચ્છુ ગેંગનો નામચીન મુન્નો તડબુચ સહિત 3 આરોપીઓની ધરપકડ કરવાની બાકી છે.એમ જાણવા મળે છે.