આપઘાત:વાસદ બ્રિજ પરથી 2 દિવસમાં 2 યુવકોએ મોતની છલાંગ લગાવી

વડોદરા શહેરના છાણી જકાતનાકા વિસ્તારમાં રહેતા 30 વર્ષના યુવકે વાસદ બ્રીજ પરથી નદીમાં મોતની છલાંગ લગાવી હતી. તદુપરાંત સાવલીના રાણીયા ગામના યુવકે પણ બ્રિજ પરથી ઝંપલાવ્યુ હતું.

નંદેશરી પોલીસ મુજબ છાણી જકાતનાકા વિસ્તારની વાસુ રેસીડેન્સીમાં રહેતો ૩૦ વર્ષનો ઇમાન્યુઅલ છોટાભાઈ મકવાણા ગોરવાની ખાનગી કંપનીમાં નોકરી કરતો હતો. તેના પરિવારમાં માતા-પિતા એક ભાઈ અને એક બહેન છે . ઇમાન્યુઅલને આંખની તકલીફ હતી. ગત 12મી તારીખે તેણે વાસદ બ્રીજ પરથી મહીસાગર નદીમાં ભૂસકો માર્યો હતો. ઘટનાની જાણ થતા નંદેશરી પોલીસ સ્થળ પર પહોંચતાં ફાજલપુર નજીક થી ઈમાન્યુઅલની લાશ મળી હતી. આંખની તકલીફથી કંટાળી તેણે આ પગલું ભર્યું હોવાનું પોલીસ તપાસમાં બહાર આવ્યું છે.

બીજા બનાવમાં સાવલી તાલુકાના રાણીયા ગામનો 20 વર્ષના કેતન રામસિંહ ડામોરે વાસદ બ્રિજ પરથી 13મી તારીખે બપોરે ભૂસકો માર્યો હતો. બનાવના પગલે ફાયર બ્રિગેડ અને નંદેશરી પોલીસ સ્થળ પર દોડી ગઈ હતી. ફાજલપુર નજીકથી કેતનનો મૃતદેહ મળી આવ્યો હતો.