રજૂઆત:રેલવેના ભાડા ચૂકવવા છતાં તંત્રના પાપે એક હજાર શ્રમિકો અટવાયાં

લોકડાઉનમાં જંબુસરની કંપનીઓ સહિત અલગ અલગ વ્યવસાયમાં કામ કરતા 1 હજાર શ્રમિકો બેરોજગાર બનતા ખાવાના ફાંફા પડી રહ્યા છે. હવે તેઓ વતન જવા અધીરા બન્યા છે. પરપ્રાંતિયોએ વતન જવા ઉછીના રૂપિયા લઇ ટ્રેનના ભાડાની રકમ જમા કરાવી છતાં વતનમાં જવા કોઈ સંદેશો ન મળતાં જંબુસર મામલતદાર કચેરી ખાતે મામલતદાર બી.એ.રોહિત અને ધારાસભ્ય સંજય સોલંકીને રજૂઆત કરી હતી. ઉપરાંત પ્રાંત કચેરી ખાતે જઇ યુપી, બિહાર અને ઝારખંડના 5-7 પરપ્રાંતિયોએ સોશિયલ ડિસ્ટન્સ રાખી પ્રાંત અધિકારી એ.કે. કલસરિયાને રજૂઆત કરી હતી.પીઆઇ કંપનીમાં માર્ચથી પગાર કરાયો નથી તે સહિત વહેલીતકે વતન જવાની માંગણીઓ સાથે વેદના ઠાલવી હતી. પ્રાંત અધિકારીએ થોડી ધીરજ અને સંયમ રાખો બે-ત્રણ દિવસમાં વતન મોકલવાની વ્યવસ્થા કરી દેવાશે તેવી હૈયાધારણા આપી હતી.