હાલાકી:પેન્શન અને પગારની તારીખ આવતાં ડભોઈમાં બેંકો પર લાંબી કતારો જામી

ડભોઇમાં એક તરફ કોરોના કાબુ બહાર થઈ રહ્યો છે. ત્યારે ડભોઇની બેન્કો બહાર કોરોના સંક્રમણને લઈ કોઈ તકેદારી લેવામાં ન આવતી હોવાનું સામે આવ્યું છે. પેન્શન તથા પગારની તારીખો આવતા જ બેંક ગ્રાહકો પગાર તેમજ પેન્શન લેવા ઉમટી પડતા લાંબી કતારો જામેલી જોવા મળી હતી. જેમાં સોશિયલ ડિસ્ટન્સનો સંપૂર્ણ આભાવ જોવા મળ્યો હતો. તો વધુમાં છેલ્લાં 7 દિવસમાં ડભોઇની બેન્ક ઓફ બરોડા મેઇન બ્રાન્ચમાં બેન્ક મેનેજર સહિત 7 કર્મચારીઓને કોરોના રિપોર્ટ પોઝિટિવ આવ્યો હોવાનું સામે આવતા ગ્રાહકોમાં ભારે ભયનો માહોલ ઊભો થયો છે.ડભોઇ પંથકમાં કોરોના કહેર યથાવત રીતે વધી રહ્યો છે.

રોજબરોજ 4થી 5ના રેશિયામાં કેસો વધી રહ્યા છે. તેવામાં ડભોઇ કન્યા શાળા નજીક આવેલ બેન્ક ઓફ બરોડામાં કોરોનાનો રાફળો ફાટયો હોય તેમ છેલ્લા 7 દિવસમાં 7 કર્મચારીઓ કોરોના પોઝિટિવ આવ્યા હોવાની માહિતીથી નગરમાં ભારે ભયનો માહોલ ઊભો થયો છે. જ્યારે બેન્કના મેનેજર સહિત 7 કર્મચારીઓ પોઝિટિવ આવતા બેન્કની કામગીરી બંધ કરવામાં આવી છે. તો તંત્ર દ્વારા નિ:સક્રિય કામગીરીને પગલે લોકોમાં ભારો ભાર રોષની લાગણી પ્રવતી છે. ડભોઇની અન્ય બેન્કો બહાર પણ સોશિયલ ડિસ્ટન્સનું પાલન કરવામાં આવતું નથી.

લોકો માસ્ક અને સેનેટાઇઝેશનને હવે નજર અંદાજ કરવા લાગ્યા છે. તંત્ર દ્વારા વહેલી તકે કડક વલણ દાખવામાં નહીં આવે તો ડભોઇ પંથકમાં કોરોનાના કેસો વધવાની સંભાવના છે. આરોગ્યમાંથી મળતી માહિતી મુજબ છેલ્લાં 42 કલાકમાં 3 કેસ પોઝિટિવ આવ્યા હતા. તો ગત માર્ચ માસમાં કોરોનાનો આંક ડભોઇ તાલુકા અને નગરમાં આશરે 100ને પાર ગયો હોવાનું જાણવા મળ્યું છે.હેમંત પાઠક ડભોઇ