દુર્ઘટના:મીઠીબોર પાસેના જંગલમાં શખ્સ ઉપર રીંછનો હુમલો, યુવકને હાથ ઉપર ઇજા ઉપરાંત ફ્રેકચર થયું

છોટાઉદેપુર જિલ્લાના મીઠીબોર ગામ પાસેના જંગલમાં ટીમરૂના પાન વિણવા ગયેલા લોકો પૈકીના એક શખ્શ ઉપર રીંછે હુમલો કર્યો. ઇજાગ્રસ્ત યુવકને સારવાર અર્થે છોટાઉદેપુર ખાતેની હોસ્પીટલમાં દાખલ કરાયો. યુવકને હાથ ઉપર ઇજા થઇ ઉપરાંત ફ્રેકચર પણ થયું. ઇજાગ્રસ્ત યુવકની ડી.એફ.ઓ.એ મુલાકાત લીધી. મીઠીબોર ગામ રતનમહાલ જંગલ નજીક આવેલો વિસ્તાર છે.
મીઠીબોર ગામ પાસેનું જંગલ રતનમહાલ સેંચુરીની નજીક આવેલો વિસ્તાર
છોટાઉદેપુર જિલ્લાના મીઠીબોર ગામ નજીકના જંગલમાં વહેલી સવારે બનેલા આ બનાવ અંગે વધુ માહિતિ આપતા ડી.એફ.ઓ.નિલેશભાઇ પંડ્યાએ જણાવ્યું હતું કે,”મીઠીબોર નજીકના જંગલમાં સવારે પાંચેક વાગ્યાના ટીમરૂના પાન વિણવા માટે કેટલાક લોકો ગયા હતા. એ વખતે ત્યાં અચાનક જ બે રિંછ આવી ગયા હતા. ટીમરૂના પાન વિણતા બળવંતભાઇ રામસિંગભાઇ નાયક રહે.ગદોલા ઉપર રીંછે હુમલો કર્યો હતો. જેથી તેમણે બૂમો પાડતા અન્ય લોકો એકત્ર થઇ ગયા હતા. ટોળુ ભેગું થતા રીંછ ત્યાંથી નાસી છુટ્યા હતા. રીંછના હુમલાથી ઇજાગ્રસ્ત બનેલા બળવંતભાઇને છોટાઉદેપુરની દેવર્ષી હોસ્પીટલમાં દાખલ કરવામાં આવ્યો છે. હાથમાં ઇજા થઇ છે તેમજ ફ્રેકચર થયું છે. મીઠીબોર ગામ પાસેનું જંગલ રતનમહાલ સેંચુરીની નજીક આવેલો વિસ્તાર છે. જેથી રીંછ આ વિસ્તારમાં આવી જાય.”