પક્ષીઓની સંખ્યામાં ઘટાડો:ઉનાળુ વૅકેશન રદ રણમાં 48 ડિગ્રી ગરમી પડતાં વિદેશી પક્ષીઓ ન આવ્યાં

દર વર્ષે યાયાવર પક્ષીઓના કલરવથી પાટડી પાસેના રણ અને ઘુડખર અભયારણ્યમાં ઉનાળો રમણીય બની રહેતો હતો પરંતુ આ વર્ષે અતિશય ગરમીને કારણે વિદેશી પક્ષીઓને ઉનાળુ વૅકેશન રદ કરવું પડ્યું હોય, તેવું લાગી રહ્યું છે. પક્ષીઓ 50 ડિગ્રી તાપમાનમાં ઊડી શકતાં નથી અને આકાશમાંથી પટકાય છે ત્યારે આ વખતે 46થી 48 ડિગ્રી તાપમાને રણ તપ્યું હોવાથી વિદેશી પક્ષીઓની સંખ્યામાં નોંધપાત્ર ઘટાડો રહ્યો છે. સાથે જ મુસાફરોની સંખ્યા પણ નહિવત્ છે. છેલ્લા મહિનામાં એક પણ પ્રવાસી નથી આવ્યો જ્યારે 2 મહિનામાં માત્ર 7થી 8 પ્રવાસી જ આવ્યા છે.

16 જૂનથી અભ્યારણ 4 માસ બંધ રહેશે
ઘુડખર સહિતનાં સસ્તન પ્રાણીઓના સંવનનકાળનો સમયગાળો હોવાથી ઘુડખર અભ્યારણ સહિતનાં ગુજરાતનાં અભ્યારણ 16 જૂનથી 15 ઑક્ટોબર સુધી બંધ રહેશે.

અનીલ રાઠવા, રેન્જ ફોરેસ્ટ ઓફિસર, બજાણા

હાલમાં વિદેશથી મહાલવા આવતાં પક્ષીઓની સંખ્યા કેવી હશે?
- આ વર્ષે રણમાં પાણીના સ્રોત ઘટવાની સાથે ગરમીનું પ્રમાણ અતિશય વધારે રહેવાથી બજાણા ટૂંડી તળાવ અને વેટલેન્ડ વિસ્તારમાં વિદેશી પક્ષીઓની સંખ્યામાં નોંધપાત્ર ઘટાડો નોંધાયો છે.
રણમાં આવતાં વિદેશી પક્ષીઓ કેટલી ગરમી સહન કરી શકે છે?
- સામાન્ય રીતે કહેવાય છે કે, 50 ડિગ્રી તાપમાનમાં ઊડતાં પક્ષીઓ નીચે પટકાઈને ટપોટપ મરવા લાગે છે ત્યારે રણમાં આ વર્ષે ગરમીનું પ્રમાણ 48 ડિગ્રી સુધી પહોંચતાં એની સીધી અસર વિદેશી પક્ષીઓના આગમન પર પડી છે.
આવી કાળઝાળ ગરમીમાં ઘુડખર કેવી રીતે અસ્તિત્વ ટકાવે છે?
- રણમાં ઊગતી મોરડ વનસ્પતિમાંથી ઘુડખર ખોરાક-પાણી મેળવે છે. વધુમાં અભ્યારણ વિભાગ દ્વારા ઘુડખર સહિતનાં પ્રાણીઓ માટે ટૅન્કરો દ્વારા રણના બધા જ અવાડાઓ નિયમિત ભરવામાં આવે છે.

​​​​​​​