તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

આરોગ્ય યજ્ઞ:સુરેન્દ્રનગરના લટુડા ગામની મહિલાઓએ ગામને કોરોના મુક્ત બનાવવા આગેવાની લીધી

સુરેન્દ્રનગર3 મહિનો પહેલા
સુરેન્દ્રનગરના લટુડા ગામની મહિલાઓએ ગામને કોરોના મુક્ત બનાવવા આગેવાની લીધી
  • મુખ્યમંત્રીના મારૂં ગામ કોરોના મુક્ત ગામના મંત્રને ચરિતાર્થ કરવા નિગરાની સમિતી બનાવી
  • ગામમાં કોરોના સંક્રમણ ન ફેલાય તે માટે મહિલાઓએ અનેક કાર્ય કર્યા

કુદરતી આફત કે માનવ સર્જીત આપત્તિઓના વિકટ સમયમાં પણ સમાજને આફત - આપત્તિઓમાંથી બહાર લાવવા પુરૂષની સાથે ખભે ખભા મિલાવી અનેક દાયકાઓથી મહિલાઓ કાર્ય કરી રહી છે. કોરોનાના આ કપરા સમયમાં પણ ઝાલાવાડમાં આવેલા નાનકડા એવા ગામ લટુડાની મહિલાઓ તેમના ગામ સમાજને કોરોના મૂક્ત બનાવવાના કાર્ય થકી અન્યો માટે ઉદાહરણરૂપ બની રહી છે.

કોરોના સંક્રમણથી મુક્ત રાખવાનો આરોગ્યયજ્ઞ શરૂ કરાયો

સુરેન્દ્રનગર જિલ્લાના અંદાજે 3000ની વસતી ધરાવતાં લટુડા ગામની જાગૃત મહિલાઓએ તેમના ગામમાંથી કોરોનાના સંક્રમણને દૂર કરવા અને ગામને કોરોના મુક્ત રાખવા કમર કસી છે. લટુડા ગામને કોરોના મૂક્ત રાખવા ગામના સરપંચ, ઉપસરપંચ, તલાટી મંત્રી, શાળાના આચાર્ય, શિક્ષક, ફિમેઈલ હેલ્થ વર્કર અને આશાવર્કર સહિતના બહેનો આગળ આવ્યા અને લટુડામાં આરંભાયો લોકોને કોરોના સંક્રમણથી મુક્ત રાખવાનો આરોગ્ય યજ્ઞ.

નિગરાની સમિતિની રચના કરવામાં આવી

સરપંચ સંગીતાબેન તેમના આ અભિયાનની વિગતો આપતા કહે છે કે, ગત વર્ષે કોરોનાના સંક્રમણને ધ્યાને ગામના તલાટી બહેન સાથે મળી અમે અમારા ગામને એકથી વધુ વખત સેનેટાઈઝ કરાવવાની સાથે આરોગ્ય વિભાગ, શાળાના આચાર્ય - શિક્ષકો તેમજ આંગણવાડી વર્કર અને આશા બહેનો સાથે સંકલનમાં રહીને સર્વે સહિતની કામગીરી હાથ ધરી હતી. આ વર્ષે પણ આ તમામ કામગીરી ઉપરાંત ગામના કોઈ વ્યક્તિ કોરોના પોઝિટિવ આવે તેવા સમયે આરોગ્ય વિભાગને જાણ કરી દર્દીને હોમ આઈસોલેશનમાં જ સારવાર પૂરી પાડવામાં આવી રહી છે. ગામને કોરોનાના સંક્રમણથી બચાવવાનું કાર્ય વધુ સારી રીતે થઈ શકે તે માટે 10 સભ્યોની નિગરાની સમિતિની પણ રચના કરી તમામ કામ ઉપર દેખરેખ રાખવામાં આવી રહી છે.

45 વર્ષથી વધુ વયના 280 લોકોને પણ રસી આપવામાં આવી

સરપંચની વાત સાથે સહમત થતાં ફિમેઈલ હેલ્થ વર્કર જ્યોતિબહેન જણાવે છે કે, આરોગ્ય વિભાગ દ્વારા પણ આ ગામમાં સર્વેલન્સની કામગીરીની સાથે કોરોના સંક્રમિત વ્યક્તિના ઘરની મુલાકાત લઈ તેમને હોમ આઈસોલેટમાં રાખી જરૂરી દવા આપવામાં આવે છે. ગામમાં કોરોનાનું સંક્રમણ ન ફેલાય તે માટે વેક્સિનેશનની કામગીરી સઘન બનાવવામાં આવી છે. અત્યાર સુધીમાં 60 વર્ષથી વધુ વયના 280 વ્યક્તિઓને રસી આપી 100 ટકા કામગીરી પૂર્ણ કરવામાં આવી છે. જ્યારે 45 વર્ષથી વધુ વયના 280 લોકોને પણ રસી આપવામાં આવી છે.

ગામની શાળામાં 4 બેડનું આઈસોલેશન સેન્ટર શરૂ

ગામમાં તલાટી તરીકે ફરજ બજાવતા હેતલબેન મોરી કહે છે, ગ્રામજનોના સાથ - સહકારથી પંચાયત દ્વારા સ્વૈચ્છિક બંધ લગાવવામાં આવ્યું છે. પ્રથમ લહેર આવી ત્યારથી અત્યાર સુધી ગામને સમયાંતરે સેનેટાઈઝ કરવામાં આવ્યું છે, તથા હાલની પરિસ્થિતીને ધ્યાને લઈ ગામની શાળામાં 4 બેડનું આઈસોલેશન સેન્ટર પણ ઉભૂ કરવામાં આવ્યું છે.

શાળા દ્વારા લોકોમાં જાગૃતિ આવે તે માટે અનેકવિધ કાર્ય કરવામાં આવ્યા

ગામના જે દર્દીને ઘરમાં હોમઆઈસોલેશનમાં રહેવાની સગવડ ન હોય તેવા લોકો આ સેન્ટરમાં રહી શકે છે. જેમાં બેડ, દવાઓ, ઓકસીમીટર, સહિતની આરોગ્યલક્ષી તમામ સુવિધાઓ પણ અમે ઉપલબ્ધ બનાવી છે. ગામમાં આવેલ શાળાના આચાર્ય હિનાબેન ઉપાધ્યાય કહે છે કે, ગામને કોરોના સંક્રમણથી બચાવવામાં શાળાની પણ ભૂમિકા મહત્વની રહી છે. શાળા દ્વારા લોકોમાં જાગૃતિ આવે તે માટે અનેકવિધ કાર્ય કરવામાં આવ્યા છે. શાળાને સેનેટાઈઝ કરવાની સાથે બહારથી શાળામાં આવતા વ્યક્તિ સેનેટાઈઝ થઈને જ પ્રવેશ કરે તેવી વ્યવસ્થા ઉભી કરવામાં આવી છે. એટલું જ નહી પરંતુ સૌથી અગત્યની બાબત એ છે કે, શાળામાં અભ્યાસ કરતાં બાળકોના વાલીઓનું વોટસએપ ગ્રુપ બનાવી અમે આ ગ્રુપના માધ્યમથી વાલીઓને કોરોના સામે રક્ષણ કેવી રીતે મેળવી શકાય. તે બાબતના સંદેશાઓ મોકલી તેમને જાગૃત કર્યા હતા.

કોરોના મુક્ત ગામની વિભાવનાને ચરિતાર્થ કરી

આ ઉપરાંત સરકારની વખતો વખતની સૂચનાઓને ધ્યાને લઈ અમારી શાળાના શિક્ષકો દ્વારા આરોગ્ય કર્મીઓ સાથે રહીને ૩ વાર સર્વેની કામગીરી પણ કરવામાં આવી છે. કોરોનાના આ કપરા કાળમાં આજે અનેક લોકો માનસીક રીતે ભય અનુભવી રહ્યાં છે, તેવા સમયે જિલ્લા મથક સુરેન્દ્રનગરથી માત્ર નવેક કિલોમીટર દૂર આવેલા લટુડા ગામની મુઠી ઉંચેરી મહિલાઓએ તેમના ગામના લોકોને કોરોના સંક્રમણથી મુક્ત રાખવા હાથ ધરેલા સહિયારા પુરૂષાર્થ સાથેના કાર્યો સાચા અર્થમાં મુખ્યમંત્રીશના મારૂં ગામ કોરોના મુક્ત ગામની વિભાવનાને ચરિતાર્થ કરી રહ્યાં છે.

અન્ય સમાચારો પણ છે...