અગરિયાઓને રાહત:રણમાં ધૂળની ડમરીઓ વચ્ચે ગરમીનો પારો નીચે આવતા અગરિયાઓને રાહત મળી

હાલમાં રણમાંથી ડમ્પરો અને ટ્રકો દ્વારા મીઠું ખેંચવાની સીઝન ચાલુ થઇ છે. એવામાં છેલ્લા બે દિવસથી રણમાં ધુળની ડમરીઓ વચ્ચે ગરમીનો પારો 1 થી 2 ડીગ્રી સુધી ઘટતા રણમાં મીઠું પકવતા અગરિયાઓ અને મીઠું ખેંચવાની સીઝનમાં જોતરાયેલા મજૂરોએ રાહતનો દમ લીધો હતો.

હોળી ધૂળેટીના તહેવાર બાદ રણમાંથી ડમ્પરો અને ટ્રકો દ્વારા ખારોઘોઢા મીઠું ખેંચવાની સીઝન શરૂ થઇ છે. એમાય ગત અઠવાડીયામાં રણમાં ગરમીનો પારો વધીને 43 થી 44 ડીગ્રી સુધી પહોંચતા રણમાં મીઠું પકવતા અગરિયાઓ અને મજૂરો કાળઝાળ ગરમી અને બપોર પડતા ધોમધખતા તાપમાં ત્રાહિમામ પોકારી ઉઠ્યા હતા.

છેલ્લા બે દિવસથી રણમાં ધૂળની ડમરીઓ વચ્ચે ગરમીનો પારો એકથી બે ડીગ્રી સુધી ઘટતા રણમાં મીઠું પકવતા અગરિયાઓ અને મીઠું ખેંચવાની સીઝનમાં જોતરાયેલા મજૂર સમુદાયે રાહતનો દમ લીધો હતો. બીજી બાજુ છેલ્લા બે દિવસથી રણમાં ઉડતી ધૂળની ડમરીના કારણે રણમાંથી મીઠું ખેંચવાની સીઝનમાં નવા પકવાયેલા મીઠામાં નુકશાન થવાની ભીતીથી અગરિયા અને મીઠાના વેપારીઓમાં ચિંતાની લાગણી ફેલાવા પામી છે. હાલમાં રણમાં અંદાજે 10થી 12 લાખ મેટ્રિક ટન મીઠું પડ્યું છે. એવામાં રણમાં આંધી સાથે ધૂળની ડમરીઓના લીધે મીઠાની ગુણવત્તામાં પણ અસર પડવાની સંભાવનાથી મીઠું પકવતા અગરિયાઓની સાથે મીઠાના વેપારીઓનો જીવ પણ તાળવે ચોટ્યો છે.