હાલાકી:વઢવાણ ST બસ સ્ટેશનમાં રૂટનું ટાઇમ ટેબલ ઝાંખુ થયું

વઢવાણ એસટી બસ સ્ટેશનમાં 11 વર્ષ પહેલા રૂટનું બોર્ડ બનવાયું હતુ. પરંતુ આ બોર્ડને ઝાંખપ આવતા મુસાફરોને આંખો ફાડી ફાડીને રૂટ શોધવો પડી રહ્યો છે. જ્યારે કેટલીક બસો આવતી નથી તો કેટલીક બારોબર જતી રહેતી હોવાની પણ રાવ ઉઠી છે. વઢવાણ ધોળીપોળ વિસ્તારમાં નવા બસ સ્ટેશનમાં પૂછપરછની બારી પાસે બસના રૂટ અને સમય સાથેનું બનાવેલું બોર્ડ ઝાંખુ પડતા અને મુસાફરોને પોતાના ગામનો રૂટ શોધવામાં હાલાકી પડી રહી છે.

આ બોર્ડમાં અંદાજે 183 જેટલા રૂટો અને તેનો સમય બતાવવામાં આવ્યો હતો. આ અંગે નવઘણભાઈ, રમેશભાઈ, ગોરધનભાઈ વગેરે જણાવ્યું કે, બોર્ડમાં અમુક રૂટો અને સમય ન દેખાતા મુશ્કેલીનો સામનો કરવો પડે છે. જ્યારે કેટલીક બસો તો આવતી જ નથી અને કેટલીક તો બારોબાર જતી રહેતા ખાનગી વાહનોનો સહારો લેવો પડે છે. આ અંગે તંત્રે જણાવ્યુ કે, કોરોનાની મહામારીના કારણે જે બસો તેમજ વિદ્યાર્થી ટ્રીપો બંધ થઇ હતી તે થોડા સમયમાં જ ચાલુ કરવાની છે. આથી બસોના રૂટ તેમજ સમય સહિતનું નવુ જ ટાઇમટેબલ બોર્ડ 8 કે 10 દિવસમાં બનાવી નાંખવામાં આવશે.