કોરોના બેકાબુ:કોરોનાકાળના 219 દિવસમાંથી 40 દિવસ 20થી વધુ કેસ અને 17 દિવસ 3થી વધુ મોત

સુરેન્દ્રનગર જિલ્લામાં છેલ્લા થોડા સમયથી કોરોનાથી મોતની સંખ્યા વધી રહી છે. જિલ્લામાં શનિવારે પણ કોરોનાની સારવાર લેતા 4 દર્દીઓના મોત થયા છે. ત્યારે કોરોનાકાળના 219 દિવસો પર નજર કરીએ તો 17 દિવસો એવા છે કે જેમાં 3 કે તેથી વધુ દર્દીઓના મોત થયા છે. જયારે 40 દિવસો 20 કે તેથી વધુ કેસો નોંધાયા છે. આ ઉપરાંત 50 કે તેથી વધુ દર્દીઓ સાજા થયા હોય તેવા 10 દિવસો છે. સુરેન્દ્રનગર જિલ્લામાં કોરોનાનો પ્રથમ કેસ તા. 24 એપ્રિલના રોજ નોંધાયો હતો. ત્યારે અત્યાર સુધીના કોરોના કાળના 219 દિવસો પર નજર કરીએ તો 40 દિવસો એવા છે કે, જેમાં 20થી વધુ કેસો નોંધાયા હોય. સૌથી વધુ કેસ તા. 7 સપ્ટેમ્બરના રોજ 61 નોંધાયા હતા. જયારે 3 કે તેથી વધુ મોત થયા હોય તેવા 17 દિવસો છે.

જિલ્લામાં સૌથી વધુ મોત તા. 26 નવેમ્બરે 6 નોંધાયા હતા. છેલ્લા થોડા દિવસોથી કોરોનામુકત દર્દીઓની સંખ્યા પણ વધી રહી છે જે જિલ્લાવાસીઓ માટે સારા સમાચાર છે. કોરોના કાળના 10 દિવસ તો એવા છે જેમાં 50થી વધુ દર્દીઓ કોરોનામુકત થયા હોય. શનીવારે પણ જિલ્લામાં કોરોનાના 13 કેસ નોંધાયા છે. જેમાં લખતરનો 32 વર્ષીય યુવાન અને જિલ્લાના અન્ય ભાગોના 12 લોકો કોરોના સંક્રમીત થયા છે. 13 કેસ સાથે જિલ્લાનું કોરોના મીટર 2994 પર પહોંચ્યુ છે. જિલ્લામાં આજે કોરોનાનો આંક 3 હજારને પાર જવાની શકયતા છે. આ ઉપરાંત જિલ્લામાં શનીવારે 4 વ્યકિતઓને કોરોના ભરખી ગયો છે. સુરેન્દ્રનગર શહેરના 80 વર્ષીય વૃધ્ધ, લીંબડીના 65 વર્ષીય વૃધ્ધ, પાટડી તાલુકાના શેડલાના 80 વર્ષીય વૃધ્ધાઅને લખતરના 60 વર્ષીય પુરૂષનું કોરોનાની સારવાર દરમિયાન મોત થયુ છે. શનીવારના 4 મોત સાથે જિલ્લામાં કુલ મૃત્યુ આંક 188 થયો છે.

શનિવારે કોરોનાથી સુરેન્દ્રનગર, લીંબડીના વૃદ્ધ, પાટડીના વૃદ્ધા તેમજ લખતરના પુરુષ કોરોનાથી મૃત્યુ પામ્યાં
આ દિવસોમાં 20થી વધુ કેસ

​​​​સુરેન્દ્રનગર જિલ્લામાં કોરોનાનો પ્રથમ કેસ તા. 24 એપ્રિલના રોજ થાનના આધેડનો નોંધાયો હતો.