વ્યવસ્થા:કોરોનાનું નેગેટિવ સર્ટિ. અને સબંધી હશે તો જ કેદી સાથે મુલાકાત થશે

કોરોના સંક્રમણને ધ્યાને લઇ તા. 25મેથી સમગ્ર રાજ્ય સાથે સુરેન્દ્રનગરની સબ જેલમાં કેદીઓના સગાવ્હાલા અને મિત્રોને મુલાકાત બંધ કરાઇ દેવાઇ હતી. ત્યારબાદ માત્ર વીડિયો કોલથી કેદીઓ મુલાકાત કરતા હતા. ત્યારે હવે સરકારે કોરોનાનું નેગેટિવ સર્ટિ અને લોહીનો સબંધ હોય તેવા પરિવારજનોને કેદીઓ સાથે મુલાકાતની છુટ આપી છે.સુરેન્દ્રનગરની સબજેલમાં વિવિધ ગુનાસર જેલવાસ ભોગવતા કેદીઓ પર કોરોના સંક્રમણને ધ્યાને લઇ પરિવારજનો સાથે રૂબરૂ મુલાકાત તા. 25મેથી બંધ કરાઇ હતી.

ત્યારબાદથી કેદીઓ પરિવારજનો સાથે માત્ર વીડિયો કોલથી વાત કરતા હતા. ત્યારે હવે કોરોનાના કેસો સમગ્ર રાજ્યમાં ઘટી રહ્યા છે. તેવા સમયે જેલ સત્તાવાળાઓએ પણ કેદીઓને પરિવારજનો સાથે મંજૂરીની છુટ આપી છે. જેમાં જેને લોહીનો સબંધ હોય તેવા જ પરિવારજનો કેદીઓને 15 દિવસમાં 1 વાર મળી શકશે.

આ ઉપરાંત મળવા આવ્યા પહેલાના 3 દિવસમાં પરિવારજનોએ કોરોનાનો એન્ટિજન ટેસ્ટ કરાવવો પડશે અને કોરોના નેગેટિવનું સર્ટિફિકેટ પણ જેલમાં રજૂ કરવુ પડશે. આ અંગે જેલર એચ.આર.રાઠોડે જણાવ્યુ કે, સરકારની સૂચના મુજબ કેદીઓને માત્ર લોહીના સબંધ હોય તેવા પરિવારજનો સાથે જ મુલાકાત કરવા દેવાશે. પરિવારજનો કેદીઓ સાથે સોશિયલ ડિસ્ટન્સ સાથે મળે તે માટે આયોજન કરવા જેલ સ્ટાફને સૂચના પણ આપી દેવાઇ છે.